عسکری طاقت، دوہرا معیار اور عالمی تنازعات: امریکی انتخابات کے نتائج کا دنیا پر اثر

فروری 2023 میں جب امریکی صدر جو بائیڈن اچانک یوکرین کے دارالحکومت کیئو دورے پر پہنچے تو فضا میں روسی حملوں سے خبردار کرنے والے سائرن بجنے کی آوازیں گونج رہی تھیں۔ جو بائیڈن نے بعد میں اس وقت کو یاد کرتے ہوئے کہا تھا کہ 'مجھے ایک احساس ہوا۔۔۔ پہلے سے زیادہ طاقتور، کہ امریکہ دنیا کے لیے ایک مشعل کی طرح ہے۔'

اور اس وقت دنیا انتظار میں ہے کہ یہ خودساختہ مشعل کس کے ہاتھ میں جائے گی جب آئندہ ہفتے امریکی شہری صدارتی انتخابات میں ووٹ دیں گے۔ کیا کملا ہیرس جو بائیڈن کی تقلید کریں گی جن کا ماننا ہے کہ 'موجودہ حالات میں امریکہ پیچھے نہیں ہٹ سکتا' یا پھر ڈونلڈ ٹرمپ فتح سے ہمکنار ہوں گے جو سمجھتے ہیں کہ اب 'گلوبلزم کے بجائے امریکنزم' کا وقت ہے۔

ہم ایک ایسی دنیا میں زندہ ہیں جہاں امریکہ کا عالمی اثرورسوخ سوالات کی زد میں ہے۔ علاقائی طاقتیں اب اپنا راستہ خود بنا رہی ہیں، آمرانہ ریاستیں اپنے اتحادی خود چن رہی ہیں اور غزہ سمیت یوکرین میں تباہ کن جنگ جاری ہے۔ ایسے میں یہ سوال اٹھ رہا ہے کہ واشنگٹن یعنی امریکی حکومت کا کردار کتنا اہم رہ گیا ہے؟

تاہم امریکہ اپنی معاشی اور عسکری طاقت کے بل بوتے پر اہمیت کا حامل ہے اور بہت سے عالمی اتحادوں میں اس کا کردار ہے۔ میں نے چند تجزیہ کاروں سے بات چیت کی اور یہ جاننے کی کوشش کی کہ اس انتہائی اہم الیکشن کے عالمی اثرات کیا ہوں گے اور اس انتخاب کا نتیجہ دنیا کو کیسے بدل سکتا ہے۔

عسکری طاقت

نیٹو کی سابق ڈپٹی سیکرٹری جنرل روز گوٹیموئیلر کہتی ہیں کہ ڈونلڈ ٹرمپ 'یورپ کے لیے ایک ڈراؤنا خواب ہیں کیوں کہ نیٹو سے الگ ہونے کی ان کی دھمکی اب تک ہر کسی کے کان میں گونج رہی ہے۔'

واضح رہے کہ امریکہ اپنے دفاع پر نیٹو کے باقی 31 رکن ممالک کے مجموعی بجٹ کے مقابلے میں دو تہائی رقم خرچ کرتا ہے۔ نیٹو سے ہٹ کر دیکھیں تو امریکہ دنیا میں سب سے زیادہ دفاعی اخراجات کرنے والے ممالک کی فہرست میں نہ صرف پہلے نمبر پر ہے بلکہ اس کا بجٹ اگلے 10 ممالک، بشمول روس اور چین، کے مجموعی دفاعی بجٹ سے بھی زیادہ ہے۔

ٹرمپ کا دعوی ہے کہ وہ نیٹو کے رکن ممالک کو مجبور کر دیں گے کہ وہ اپنا دفاعی بجٹ بڑھائیں کیونکہ 2024 میں صرف 23 نیٹو ممالک مجموعی آمدن کا دو فیصد تک ہی دفاع پر خرچ کرتے ہیں۔

اور اگر کملا ہیرس جیت جاتی ہیں تو روز گوٹیموئیلر کا ماننا ہے کہ نیٹو محفوظ ہاتھوں میں ہو گا۔ تاہم کملا ہیرس کے معاملے میں بھی وہ محتاط ہیں۔ ان کا کہنا ہے کہ انھیں نیٹو اور یورپی یونیئن سے مل کر یوکرین میں فتح کے لیے کام کرنا ہو گا لیکن وہ دفاعی بجٹ میں اضافے کے دباو کو جاری رکھیں گی۔

کملا ہیرس کی مشکل یہ ہے کہ انھیں ایسے سینیٹ اور ایوان نمائندگان کی موجودگی میں حکومت کرنا ہو گی جہاں جلد ہی ریپبلکن جماعت کی اکثریت ہو سکتی ہے جو بیرون ملک جنگوں کی حمایت سے گریز کرے گی۔ امریکہ میں یہ احساس بڑھ رہا ہے کہ چاہے جو بھی صدر بنے، یوکرین پر اس جنگ سے باہر نکلنے کا دباؤ بڑھے گا کیونکہ امریکی سیاست دان اور اراکین پارلیمنٹ اب بڑے بڑے امدادی پیکج منظور کرنے سے ہچکچا رہے ہیں۔

روز گوٹیموئیلر کہتی ہیں کہ 'جو بھی ہو، میرا نہیں خیال کہ نیٹو کو بکھرنا چاہیے۔ یورپ کو آگے بڑھ کر سربراہی کرنے کی ضرورت ہے۔'

یہ بھی پڑھیں: بیوروکریسی میں تقرر و تبادلے

'دوہرا معیار'

امریکی صدر کو ایک ایسی دنیا کا سامنا ہوگا جہاں عالمی طاقتوں کے درمیان تنازع کا خطرہ سرد جنگ کے بعد سب سے زیادہ بڑھ گیا ہے۔

کمفرٹ ایرو بین الاقوامی کرائسس گروپ کی صدر ہیں۔ ان کا کہنا ہے کہ 'امن اور سکیورٹی کے معاملات میں امریکہ اب بھی سب سے زیادہ بااثر بین الاقوامی کھلاڑی ہے۔' ساتھ ہی وہ یہ بھی کہتی ہیں کہ 'تنازعات کو حل کرنے کی امریکی طاقت کم ضرور ہوئی ہے۔'

دنیا میں جاری جنگوں کو روکنا مشکل ہوتا جا رہا ہے۔ کمفرٹ ایرو اس صورت حال کو ایسے بیان کرتی ہیں کہ 'بڑی طاقتوں کے درمیان مقابلہ تیز ہو رہا ہے اور درمیانی سطح کی طاقتیں بھی اب زیادہ ہو چکی ہیں۔' نتیجتاً، جان لیوا تنازعات طویل ہوتے جا رہے ہیں۔

یوکرین کی جنگ، جس میں بہت سے طاقتیں ملوث ہیں، کے علاوہ مشرق وسطی اور سوڈان میں جاری تنازع علاقائی طاقتوں کے مفادات کی لڑائی ہے، جہاں مخالفین امن کی بجائے جنگ جاری رکھنے میں زیادہ دلچسپی رکھتے ہیں۔

کمفرٹ ایرو کہتی ہیں کہ 'امریکہ اخلاقی میدان میں ہار رہا ہے۔ عالمی کھلاڑی دیکھ رہے ہیں کہ یوکرین میں روس کے خلاف امریکہ کا معیار مختلف ہے، جبکہ غزہ میں اسرائیل کے بارے میں کچھ اور۔ سوڈان کی جنگ میں ہولناک مظالم ہوئے لیکن اسے کم اہمیت دی گئی۔'

ان کا کہنا ہے کہ 'کملا ہیرس موجودہ دور میں تسلسل کی نمائندگی کرتی ہیں۔ اگر ٹرمپ جیتے تو شاید وہ اسرائیل کو غزہ میں مزید کھل کر کھیلنے کا موقع دیتے، اور انہوں نے عندیہ دیا ہے کہ وہ ماسکو سے یوکرین کے معاملے پر ڈیل کرسکتے ہیں۔'

مشرق وسطی کے مسائل پر کملا ہیرس نے جو بائیڈن کے خیالات کا اعادہ کیا ہے اور اسرائیل کی دفاع کی حمایت کی ہے۔ تاہم انہوں نے یہ بھی کہا کہ 'معصوم فلسطینیوں کا قتل روکنا ہوگا۔'

ٹرمپ نے بھی کہا ہے کہ 'امن کی صورت حال میں واپس جانے اور لوگوں کے قتل کو روکنے کا وقت آ چکا ہے۔' تاہم انہوں نے خبریں دیتے ہوئے اسرائیلی وزیر اعظم سے کہا ہے کہ انہیں 'جو کرنا ہے، کریں۔'

ٹرمپ خود کو امن کا علمبردار کہتے ہیں۔ انہوں نے اتوار کی رات العربیہ ٹی وی سے بات کرتے ہوئے کہا کہ 'میں جلد ہی مشرق وسطی میں امن قائم کر دوں گا۔' ٹرمپ نے دعویٰ کیا کہ وہ 2020 کے ابراہام معاہدے کو وسعت دیں گے، جس کے تحت اسرائیل اور چند عرب ممالک کے درمیان تعلقات بحال ہوئے، مگر اس معاہدے پر تنقید کی جاتی ہے کہ اس میں فلسطینیوں کو نظرانداز کیا گیا، جس نے ایک بڑا بحران کھڑا کر دیا اور اب وہ جنگ کی شکل اختیار کر گیا ہے۔

یوکرین کے بارے میں ٹرمپ نے کبھی بھی روسی صدر پوتن کے لئے اپنے مثبت خیالات کو چھپانے کی کوشش نہیں کی۔ انہوں نے کہا ہے کہ وہ یوکرین جنگ ختم کرنے کے خواہاں ہیں اور امریکی عسکری و مالی امداد بھی۔ ایک حالیہ جلسے میں انھوں نے اعلان کیا کہ 'ہمیں باہر نکل جانا چاہیے۔'

دوسری طرف کملا ہیرس نے کہا ہے کہ 'مجھے یوکرین کے ساتھ شانہ بشانہ کھڑے ہونے پر فخر ہے۔ میں یوکرین کے ساتھ کھڑی رہوں گی اور اس بات کو یقینی بناؤں گی کہ یوکرین اس جنگ میں حاوی ہو۔'

تاہم کمفرٹ ایرو کو خدشہ ہے کہ جو بھی امریکہ کا صدر بنے گا، دنیا کے معاملات بدتر ہوتے جائیں گے۔