پنجاب : مزید 19 شہروں میں سیف سٹی منصوبے کی توسیع کی منظوری

لاہور (ڈیلی پاکستان آن لائن) پنجاب حکومت نے مزید 19 شہروں میں سیف سٹی کیمروں کی تنصیب کی منظوری دے دی ہے۔

تنصیب کے مقامات

سیف سٹیز حکام کے مطابق نئے کیمرے لودھراں، بہاولنگر، جہلم، وہاڑی، لیہ، تونسہ، چنیوٹ، ٹوبہ ٹیک سنگھ و دیگر شہروں میں نصب کئے جائیں گے۔ منصوبے کے تحت 19 شہروں میں 5 ہزار سے زائد کیمروں کی تنصیب کی جائے گی، اور ان سب کی نگرانی سینٹرلائزڈ مانیٹرنگ ہیڈکوارٹر سے کی جائے گی۔

اہم تفصیلات

حکام نے بتایا کہ لاہور کے ساتھ ساتھ دیگر شہروں کے کیمروں کی مانیٹرنگ کے لیے اضافی ویڈیو وال بھی بنائی جائے گی۔ کیمروں کی نیٹ ورکنگ پر تقریباً 5.5 ارب روپے کے اخراجات آئیں گے، اور یہ منصوبہ جون 2025 تک مکمل کر لیا جائے گا۔

پہلا مرحلہ

سیف سٹیز حکام کا مزید کہنا ہے کہ پہلے مرحلے میں شیخوپورہ، راولپنڈی، سیالکوٹ، گجرات، مریدکے اور گوجرانوالہ سمیت 18 شہروں میں کیمروں کی تنصیب جاری ہے۔ متعدد شہروں میں کیمرے فعال ہو چکے ہیں جبکہ باقی ماندہ کو رواں سال میں مکمل کر کے منصوبے کا باقاعدہ آغاز کیا جائے گا۔