کوئٹہ دھماکا: وزیراعظم شہبازشریف، وزیرداخلہ اوربلاول بھٹو کی شدید مذمت

کوئٹہ ریلوے سٹیشن پر دھماکا

اسلام آباد (ڈیلی پاکستان آن لائن) وزیراعظم شہباز شریف، وزیرداخلہ محسن نقوی اور چیئرمین پی پی پی بلاول بھٹو نے کوئٹہ میں ریلوے سٹیشن پر ہونے والے دھماکے کی شدید مذمت کی ہے۔

وزیراعظم شہباز شریف کا بیان

وزیراعظم شہباز شریف نے کوئٹہ ریلوے سٹیشن کے قریب دھماکے کی شدید مذمت کرتے ہوئے زخمیوں کو ترجیحی بنیادوں پر طبی امداد فراہم کرنے کی ہدایت کی۔ انہوں نے بلوچستان حکومت سے واقعے کی تحقیقاتی رپورٹ طلب کر لی۔

وزیراعظم نے اپنے بیان میں کہا کہ معصوم اور نہتے شہریوں کے جان و مال کو نقصان پہنچانے والے دہشت گردوں کو سخت قیمت ادا کرنا پڑے گی۔ دہشت گردی کے خاتمے کے لئے حکومت اور سکیورٹی فورسز مکمل طور پر سرگرم عمل ہیں۔

بلاول بھٹو زرداری کا ردعمل

چیئرمین پی پی پی بلاول بھٹو زرداری نے دھماکے کی مذمت کرتے ہوئے کہا کہ وہ دھماکے میں اپنے پیاروں کو کھونے والے خاندانوں کے غم میں برابر کے شریک ہیں۔ انہیں یقین دہانی کروائی کہ دھماکے کے زخمیوں کے بہتر علاج معالجے کو یقینی بنایا جائے گا۔ بلاول نے کہا کہ معصوم شہریوں کو نشانہ بنانے والے انسان کی شکل میں درندے ہیں، جو کسی رعایت کے مستحق نہیں۔

انہوں نے مزید کہا کہ دہشت گردی اور انتہاپسندی کے خاتمے کے حوالے سے پیپلز پارٹی کا موقف قوم کی آواز ہے اور دہشت گردوں اور ان کے سہولت کاروں کو جڑ سے اکھاڑ پھینکنے کے اقدامات کی حمایت کرتے ہیں۔

وزیرداخلہ محسن نقوی کا خدشہ

وزیرداخلہ محسن نقوی نے کوئٹہ ریلوے سٹیشن پر دھماکے کی شدید الفاظ میں مذمت کی اور قیمتی انسانی جانوں کے ضیاع پر گہرے دکھ اور افسوس کا اظہار کیا۔ انہوں نے جاں بحق افراد کے لواحقین سے دلی ہمدردی اور تعزیت کا اظہار کیا۔

محسن نقوی نے کہا کہ معصوم لوگوں کو نشانہ بنانے والے دہشت گرد کسی رعایت کے مستحق نہیں۔ اس دھماکے کی جتنی بھی مذمت کی جائے کم ہے۔ انہوں نے مزید کہا کہ دشمن پاکستان میں عدم استحکام پیدا کرنے کے لئے یہ بزدلانہ کارروائیاں کر رہا ہے اور قوم کو مل کر اس گھناو¿نی سازش کو ناکام بنانا ہوگا۔

حافظ نعیم الرحمن کی تشویش

امیر جماعت اسلامی حافظ نعیم الرحمن نے کوئٹہ دھماکے کی مذمت کرتے ہوئے کہا کہ ریلوے سٹیشن پر بم دھماکے کے نتیجے میں اب تک 24 قیمتی جانیں ضائع ہونے کی اطلاع ہے۔ بلوچستان میں پے در پے دہشت گردی کے واقعات نہ صرف ہمارے دلوں کو دہلا رہے ہیں بلکہ ملک کی سلامتی پر بھی سنگین سوالات کھڑے کر رہے ہیں۔

انہوں نے متاثرہ خاندانوں سے دلی تعزیت کا اظہار کرتے ہوئے حکومت سے مطالبہ کیا کہ فوری اور ٹھوس اقدامات کے ذریعے بلوچستان میں امن و امان کی بحالی کو یقینی بنایا جائے۔

واقعے کی تفصیلات

واضح رہے کہ آج صبح کوئٹہ میں ریلوے اسٹیشن پر دھماکا ہوا ہے، جس کے نتیجے میں 24 افراد جاں بحق جبکہ متعدد زخمی ہوئے ہیں۔