بہاولپور میں ایک ہی خاندان کے پانچ افراد کی لاشیں ملی، صرف چار سال کی بچی بیڈ کے نیچے سے زندہ بچ گئی۔

خرم کے مطابق ’کاشف، ان کی بیوی اور دو بچوں کے سروں پر گولی کے نشانات تھے جبکہ نو سالہ عبدالوہاب کا گلہ گھونٹنے کے نشانات بھی نظر آئے۔‘

پولیس نے رات گئے Uses in Urdu کو بتایا کہ ’جائے وقوعہ سے شواہد اکٹھے کیے جا رہے ہیں، لاشوں کا پوسٹ مارٹم کیا جا رہا ہے اور ہر پہلو سے تحقیقات عمل میں لائی جائیں گی۔‘

مقامی پولیس افسر نے Uses in Urdu کو بتایا کہ پولیس کو اس گھر سے ڈپریشن کے علاج کے لیے استعمال ہونے والی گولیاں بھی ملی ہیں۔

کاشف کے بھائی خرم نے اس بات کی تصدیق کی کہ ان کے بھائی ڈپریشن کا علاج کرنے والی گولیاں کھایا کرتے تھے۔ تاہم انھوں نے Uses in Urdu سے بات کرتے ہوئے بتایا کہ پولیس نے انھیں گھر کے اندر جانے نہیں دیا۔

خرم کا کہنا تھا کہ ان کے بھائی لوگوں کے مشوروں پر ڈپریشن کے علاج کے لیے گولیاں کھاتے تھے مگر اس کے باوجود ان کے بھائی بالکل ٹھیک ٹھاک تھے اور اپنا ایک چھوٹا کاروبار چلا رہے تھے۔ خرم کا کہنا ہے کہ ان کے خاندان کی کسی سے کوئی دشمنی نہیں ہے۔

انھوں نے بتایا کہ ان کے بھائی، بھابھی اور دو بھتیجوں کے جسموں پر گولیاں لگنے کے نشانات تھے۔

پولیس کا کہنا ہے کہ ابھی اس بات کا تعین کیا جائے گا کہ گولیاں کس گن یا پستول سے اور کتنے فاصلے سے چلائی گئیں۔

خرم اور ان کے گھر کے دوسرے افراد بہاولپور سے تقریباً 45 کلومیٹر دور احمد پور شرقیہ میں رہتے ہیں جبکہ ان کے مقتول بھائی کاشف اپنے بیوی بچوں کے ساتھ بہاولپور میں رہ رہے تھے۔

خرم کہتے ہیں کہ ہلاکت سے ایک رات قبل بھی کاشف کی ان کے والدین سے دو سے تین بار فون پر بات ہوئی تھی۔ ان کا کہنا تھا کہ ’سوموار کی رات ان کی والدہ کی طبعیت خراب ہوئی تو کاشف خیریت معلوم کرنے کے لیے بار بار کال کر رہے تھے۔‘

’والدہ کی خرابی طبعیت کی وجہ سے میں اپنے بھائی سے بات نہیں کر سکا اور اس وقت والدہ کو ہسپتال لے جانے کے انتظامات کر رہا تھا۔‘

خرم کے مطابق ان کی زندہ بچ جانے والی بھتیجی کو زکام اور چھاتی میں انفیکشن کی وجہ سے بخار بھی ہے۔ ان کے مطابق ڈاکٹرز نے چھوٹی بھتیجی کو دوائی دی ہے جس کے بعد اب وہ سو رہی ہیں۔

خرم نے کہا کہ ’ہم چھ بہن بھائی تھے اور اب کاشف اور ان کی بیوی بچوں کے دنیا سے چلے جانے کے بعد اب یہ بھتیجی ہمارے پاس ہی رہے گی۔‘

خرم کا کہنا تھا کہ 'ابھی کچھ سمجھ نہیں آ رہا کہ جب یہ بچی نیند سے بیدار ہو گی تو پھر اس کے سوالوں کا ہم کیا جواب دیں گے؟'