چارلس نہیں بلکہ ‘محمد’ برطانیہ میں سب سے مقبول نام ہے

سنہ 2023 میں ’محمد‘ وہ نام ہے جسے انگلینڈ اور ویلز میں رہنے والوں نے سب سے زیادہ پسند کیا اور اپنے بچوں کے ناموں کے لیے چُنا۔ اس نام کے ساتھ 4،600 سے زیادہ بچے رجسٹر ہوئے ہیں۔

برطانیہ کی قومی شماریات کے دفتر (او این ایس) کے مطابق سنہ 2016 سے بچوں کے لیے چُنے جانے والے ناموں میں محمد ہمیشہ سرفہرست رہا ہے، لیکن اب اس نام نے اپنے سے پہلے محبوب نام ’نوح‘ کو پیچھے چھوڑ دیا ہے۔

تاہم، انگلینڈ کے تین علاقے اب بھی ایسے ہیں جہاں ’محمد‘ نام شامل نہیں ہے۔

انگلینڈ اور ویلز میں ’محمد‘ نام کے انگریزی هجے میں بھی فرق موجود ہے، لیکن دو اسپیلنگز ایسے ہیں جو ٹاپ 100 کی فہرست میں شامل ہیں۔

او این ایس ہر ہجے کو ایک الگ نام کے طور پر مانتا ہے، جس میں پچھلے سالوں میں محمد کے مختلف ہجے مقبول ثابت ہوئے ہیں۔

(یہ بات قابل ذکر ہے کہ انگلینڈ اور ویلز میں ’محمد‘ نام کے انگریزی ہجے Muhammad, Mohammad اور Mohammed ہیں.)

یہ تو ہوئی لڑکوں کے نام کی بات، لڑکیوں کے ناموں میں سب سے پسندیدہ ’اولیویا‘ ہے، اور انگلینڈ اور ویلز میں بیشتر لوگ اپنی بچیوں کے لیے اسی نام کا انتخاب کرتے ہیں۔

اولیویا کے بعد امیلیا اور اسلا بھی مقبول نام ہیں، یہ نام پسندیدہ ناموں کی فہرست میں پہلے، دوسرے اور تیسرے نمبر پر ہیں اور یہ سنہ 2022 کے بعد سے تبدیل نہیں ہوئے۔

گزشتہ سال بچوں کے لیے ہائیفینیٹڈ ناموں کی مقبولیت میں اضافہ ہوا اور یہ تعداد 19,140 سے زیادہ رہی جو کہ ایک سال قبل 12,330 تھی۔

لڑکیوں کے پسندیدہ 100 ناموں کی فہرست میں لیلا، رایا اور ہیزل شامل ہیں، جبکہ جیکس، اینزو اور بودھی لڑکوں کے پسندیدہ 100 ناموں میں نمایاں ہیں۔

2023 میں مائلی، ریحانہ، کینڈرک اور ایلٹن جیسے فنکاروں کے نام بھی بہت مقبول ہوئے، اور کئی لوگوں نے اپنے بچوں کے ناموں کے لیے ان ناموں کا انتخاب کیا۔ او این ایس کا کہنا ہے کہ اس کی وجہ ممکنہ طور پر مائلی سائرس، کینڈرک لامر، ایلٹن جان اور ریحانہ کی البم ریلیز یا ہائی پروفائل پرفارمنس ہو سکتی ہے۔

تاہم، کچھ لوگوں نے ہفتے کے دنوں کے ناموں کو بھی اپنے بچوں کے ناموں کے لیے چُنا ہے، اور والدین کے منتخب کردہ ناموں میں ’سنڈے‘ یعنی اتوار اور ’وینزڈے‘ یعنی بدھ بھی شامل ہیں، جن کی مقبولیت میں پچھلے سال اضافہ ہوا ہے۔