سمندر پار پاکستانیوں کے مسائل آج بھی وہی ہیں جو کئی دہائیاں پہلے تھے: بابر خان غوری

سینیٹر بابر خان غوری کی اوورسیز پاکستانیوں کے حوالے سے بات چیت

دبئی (طاہر منیر طاہر) سابق وفاقی وزیر پورٹس اینڈ شپنگ سینیٹر بابر خان غوری نے کہا ہے کہ اوورسیز پاکستانیوں نے اپنی محنت اور کاوشوں سے اپنا وقار اور عزت بنائی ہے اور کسی حکومت نے اس میں کچھ خاص نہیں کیا۔ سمندر پار پاکستانیوں کے مسائل آج بھی وہی ہیں جو کئی دہائیاں پہلے تھے۔

مشترکہ کوششوں کی اہمیت

بیرون ملک مقیم پاکستانی ماضی میں بھی اپنے مسائل کے حل کے لیے مشترکہ کوششیں کرتے رہے ہیں اور آج بھی کر رہے ہیں۔ سمندر پار پاکستانیوں کے لیے میری رائے یہ ہے کہ وہ اجتماعی اور انفرادی سطح پر اپنے مسائل متعلقہ وزراء اور محکموں کو تحریری طور پر بھیجیں۔ جلد یا بدیر آپ کے مسائل ضرور حل ہو جائیں گے۔

پاکستانی ریسٹورنٹ کے افتتاح کی تقریب

دبئی میں ایک پاکستانی ریسٹورنٹ کے افتتاح کے موقع پر ممتاز قانون دان مخدوم رئیس قریشی اور سردار آصف کریم کی جانب سے سینیٹر بابر خان غوری کے اعزاز میں عشائیے کا اہتمام کیا گیا۔ تقریب میں مہمان خصوصی بابر غوث، حسیب باجوہ، فہیم احمد، خالد، عثمان خان، اکبر حسین، عامر خان، مشتاق پیرزادہ، سلیم احمد، عمیر خان، احمد بٹ، عاصم شہزاد اور صحافی حضرات سمیت پاکستانی کمیونٹی کے دیگر افراد بھی موجود تھے۔ دوران تقریب اوورسیز پاکستانیوں کے مسائل پر سیر حاصل گفتگو ہوئی۔

اوورسیز پاکستانیوں کے مسائل کا حل

مخدوم رئیس قریشی نے کہا کہ وہ ذاتی حیثیت سے اوورسیز پاکستانیوں کے مسائل سید قمر رضا چیئرمین بورڈ آف گورنرز اوورسیز پاکستانیز فاؤنڈیشن اسلام آباد کو بھجوائیں گے اور انہیں دورہ یو اے ای کی دعوت بھی دیں گے تاکہ وہ یہاں مقیم پاکستانیوں کے مسائل بہ نفس نفیس آ کر سنیں اور ان کا حل نکالیں۔