لاہور میں دوسرے نیشنل سکولز شطرنج چیمپئن شپ 2025 کا انعقاد، ذہین طلبہ کا قومی سطح پر ذہنی مقابلہ
دوسرا نیشنل سکولز شطرنج چیمپئن شپ 2025
لاہور (ڈیلی پاکستان آن لائن) پاکستان شطرنج فیڈریشن (CFP) کے زیر اہتمام اور عالمی شطرنج تنظیم FIDE، FIDE EDU، ایشیائی شطرنج فیڈریشن (ACF) اور لاہور گرامر سکول برائے طلبہ، جوہر ٹاؤن کے تعاون سے دوسرا نیشنل سکولز شطرنج چیمپئن شپ 2025 کامیابی سے منعقد ہوا۔ یہ مقابلہ 31 مئی تا 1 جون لاہور میں منعقد ہوا، جس میں ملک بھر کے ممتاز تعلیمی اداروں کے طلبہ نے شرکت کی۔
یہ بھی پڑھیں: کھاریاں گیریژن میں پاکستان آرمی ٹیم مقابلے، آرمی چیف کی بطور مہمان خصوصی شرکت
شرکت کرنے والے نمایاں سکولز
اس دو روزہ ذہنی معرکے میں شرکت کرنے والے نمایاں سکولز میں دی سٹی سکول، بیکن ہاؤس، ایچیسن کالج، لاہور گرائمر سکول، کراچی گرائمر سکول، لرننگ الائنس، انٹرنیشنل گرائمر سکول، اسکارسڈیل انٹرنیشنل سکول سمیت دیگر ادارے شامل تھے۔ ٹورنامنٹ کا مقصد طلبہ میں تنقیدی سوچ، نظم و ضبط، اور ذہنی صلاحیتوں کے فروغ کو اجاگر کرنا تھا۔
یہ بھی پڑھیں: ملکی ترقی و خوشحالی کیلئے ڈاکٹر عبد القدیر خان کی خدمات قابل تحسین ہیں:خرم نواز گنڈاپور
مقابلے کے نتائج
ان مقابلوں میں سٹی سکول پہلے ، لاہور گرائمر دوسرے اور کراچی گرائمر تیسرے نمبر پر رہا اور اب دی سٹی سکول ورلڈ سکولز ٹیم شطرنج چیمپئن شپ 2025 میں پاکستان کی نمائندگی کرے گا، جو رواں سال 2 سے 7 اگست تک واشنگٹن ڈی سی اور الیگزینڈریا (امریکہ) میں منعقد ہوگی۔
یہ بھی پڑھیں: شام کی آخری کرنیں، ہلچل اور خاموشی کا منظر
تنظیم اور مہمانِ خصوصی
فیڈریشن کے صدر نیشنل ماسٹر حنیف قریشی کی قیادت میں اس ایونٹ کا انعقاد کیا گیا، جنہوں نے شطرنج کو علمی اداروں میں فروغ دینے میں کلیدی کردار ادا کیا ہے۔ ان کے ساتھ تنظیمی ٹیم میں سلیم اختر (سینئر نائب صدر CFP)، عامر کریم (قائم مقام جنرل سیکریٹری)، محمد یحییٰ چیمہ (وزیراعظم منڈ سپورٹس انیشی ایٹیو کے کوآرڈینیٹر) اور دیگر منتظمین شامل تھے۔ ایونٹ کی مہمانِ خصوصی محترمہ ثمینہ رحمان، ڈائریکٹر لاہور گرامر سکول تھیں، جنہوں نے نہ صرف طلبہ کی حوصلہ افزائی کی بلکہ تعلیمی اداروں میں ذہنی کھیلوں کے فروغ کو وقت کی اہم ضرورت قرار دیا۔
بین الاقوامی شراکت داروں کا شکریہ
پاکستان شطرنج فیڈریشن نے FIDE، FIDE EDU اور دیگر بین الاقوامی شراکت داروں کا شکریہ ادا کیا، جن کے تعاون سے پاکستان عالمی سطح پر شطرنج کے میدان میں اپنا مقام مضبوط کر رہا ہے۔
