دھی رانی پروگرام کی سٹیئرنگ کمیٹی کا اجلاس، اجتماعی شادیوں کی تعداد بڑھا کر 5000 کرنے کی منظوری

اجلاس کی تفصیلات

لاہور( ڈیلی پاکستان آن لائن ) وزیر اعلیٰ پنجاب مریم نواز کی خصوصی ہدایت پر دھی رانی پروگرام کی اسٹیئرنگ کمیٹی کا اجلاس صوبائی وزیر سوشل ویلفیئر و بیت المال سہیل شوکت بٹ کی زیر صدارت ہوا، جس میں آئندہ مالی سال کے لیے اہم فیصلے کیے گئے۔

یہ بھی پڑھیں: ننکانہ صاحب میں 15 نومبر کو ضلع بھر میں عام تعطیل کا اعلان

شادیوں کی تعداد میں اضافہ

اجلاس میں متفقہ طور پر اجتماعی شادیوں کی سالانہ تعداد کو 3000 سے بڑھا کر 5000 کرنے کی منظوری دی گئی۔ مزید برآں، روایتی شادی کے تحائف کے بجائے ہر جوڑے کو دھی رانی کارڈ کے ذریعے2 لاکھ روپے نقد رقم فراہم کرنے کا فیصلہ بھی کیا گیا۔

یہ بھی پڑھیں: بھارت میں نوجوان نے حاملہ گرل فرینڈ کو شادی کیلئے دباو ڈالنے پر قتل کر دیا

اجتماعی شادیوں کی تقریب کا شیڈول

اجتماعی شادیوں کی تقریبات نومبر 2025 تا 15 فروری 2026 کے دوران منعقد ہوں گی، اور رمضان المبارک سے قبل تمام 5000 شادیاں مکمل کرنے کا ہدف مقرر کیا گیا ہے۔ وزیر اعلیٰ پنجاب کی جانب سے اس مقصد کے لیے 1.7 ارب روپے کی خطیر رقم مختص کی گئی ہے، جس پر اجلاس میں اظہار تشکر کیا گیا۔ خصوصی طور پر اس سال ہندو مذہب سے تعلق رکھنے والے مستحق جوڑوں کو بھی اجتماعی شادیوں میں شامل کیا جائے گا، جو کہ وزیر اعلیٰ پنجاب مریم نواز کی ہدایت پر کیا جا رہا ہے۔

یہ بھی پڑھیں: صدر آذربائیجان کا پاکستان میں 2 ارب ڈالر کی سرمایہ کاری کا اعلان

اجلاس میں شریک افراد

اجلاس میں سیکرٹری سوشل ویلفیئر جاوید اختر محمود، ڈی جی طارق قریشی، تمام ڈویژنل کمشنرز (ویڈیو لنک کے ذریعے) اور متعلقہ افسران شریک ہوئے۔ سہیل شوکت بٹ نے پروگرام کے پہلے سال میں کامیابی سے 3000 شادیاں مکمل کرنے پر سیکرٹری، ڈی جی، کمشنرز، ڈپٹی کمشنرز اور آر پی اوز کا شکریہ ادا کیا۔

صوبائی وزیر کا بیان

اجلاس کے شرکا سے خطاب کرتے ہوئے صوبائی وزیر سوشل ویلفیئر و بیت المال سہیل شوکت بٹ نے کہا کہ ’’دھی رانی پروگرام اب پنجاب کی بیٹیوں کے دل کی آواز بن چکا ہے۔ وزیر اعلیٰ پنجاب مریم نواز نے اس منصوبے کی سرپرستی ایک ماں کی طرح کی ہے، اور انہی کی ہدایت پر اس کا دائرہ کار وسیع کیا گیا ہے۔ انشاءاللہ اکتوبر تک تمام مستحق جوڑوں کی فزیکل ویریفکیشن مکمل کر لی جائے گی۔‘‘