اسحاق ڈار کا ترک وزیر خارجہ سے رابطہ، علاقائی پیشرفت پر تبادلہ خیال

اسلام آباد (ڈیلی پاکستان آن لائن): نائب وزیراعظم و وزیر خارجہ اسحاق ڈار اور ترک وزیر خارجہ حکان فدان کے درمیان رابطہ ہوا ہے جس میں علاقائی پیش رفت پر تبادلہ خیال کیا گیا۔

دوطرفہ اور کثیر الطرفہ تعاون

نجی ٹی وی دنیا نیوز نے دفتر خارجہ کے ترجمان شفقت علی خان کے حوالے سے بتایا کہ اسحاق ڈار اور حکان فدان نے دوطرفہ اور کثیر الطرفہ تعاون پر تبادلہ خیال کیا جس میں حالیہ علاقائی پیشرفتوں پر بھی گفتگو ہوئی۔

آسیان ریجنل فورم

ترجمان نے بتایا کہ دونوں رہنماؤں نے ملائیشیا میں ہونے والے آئندہ آسیان ریجنل فورم کے بارے میں بھی بات چیت کی۔

اسحاق ڈار کے متوقع دورے

یاد رہے کہ اسحاق ڈار جولائی میں امریکہ اور چین سمیت 4 اہم ممالک کے دورے کریں گے۔ نائب وزیراعظم اسحاق ڈار سب سے پہلے آذر بائیجان کا دورہ کریں گے، اس کے بعد انہوں نے چین میں ایس سی او وزرائے خارجہ ملاقات کے لیے جانے کا ارادہ رکھا ہے۔ اسحاق ڈار یو این سیکیورٹی کمیٹی اجلاس کی صدارت کے لیے بھی جولائی میں امریکہ کا دورہ کریں گے اور ایک اور دورہ ملائیشیا کا بھی انعقاد کریں گے۔

اسرائیلی جارحیت کے خلاف موقف

قبل ازیں وزیر خارجہ اسحاق ڈار نے کہا ہے کہ پاکستان نے ایران پر اسرائیلی جارحیت کی بھرپور مذمت کی، امریکہ کے ساتھ اچھے تعلقات کا یہ مطلب نہیں کہ غلط چیزوں میں بھی اس کا ساتھ دیں۔ ہمیں پتا تھا کہ ایران بدلہ لیے بغیر نہیں رہے گا، یہ ہمارا اسلامی و اخلاقی فرض ہے کہ ہم ایران کو سپورٹ کریں، ایران کو پس پردہ ہماری بھرپور سیاسی حمایت حاصل تھی تاکہ ایران کو نیچا نہ دکھایا جا سکے۔