خیبرپختونخوا میں گیلپ سروے پر عظمیٰ بخاری کا رد عمل بھی آ گیا

وزیر اطلاعات و ثقافت پنجاب کا بیان

لاہور (ڈیلی پاکستان آن لائن) وزیر اطلاعات و ثقافت پنجاب عظمیٰ بخاری نے کہا ہے کہ خیبرپختونخوا کی موجودہ بدحالی کسی گیلپ سروے یا تحقیق کی محتاج نہیں۔ وہاں کی زمینی حقیقت خود ایک کڑوا سچ ہے، جو ہر شہری کی زندگی میں جھلکتی ہے۔ گیلپ سروے خیبرپختونخوا میں گزشتہ 12 سالہ ’’جعلی تبدیلی‘‘ کے منہ پر ایک زوردار طمانچہ ہے۔ وہی لوگ جو کل تک گیلپ سروے کی بنیاد پر بھنگڑے ڈال رہے تھے، آج اپنی حکومت سے متعلق تلخ سچ برداشت نہیں کر پا رہے۔

یہ بھی پڑھیں: خواجہ آصف کی ایرانی نائب وزیر دفاع سے ملاقات، مختلف شعبوں میں تعاون بڑھانے کا عزم

بیرسٹر سیف کے بیان پر ردعمل

ان خیالات کا اظہار انہوں نے بیرسٹر سیف کے حالیہ بیان پر ردعمل دیتے ہوئے کیا۔ عظمیٰ بخاری نے کہا کہ سروے کے مطابق خیبرپختونخوا کے 73 فیصد عوام نے موجودہ حکومت، خصوصاً علی امین گنڈا پور کی قیادت پر عدم اعتماد کا اظہار کیا ہے۔ 71 فیصد عوام نے مطالبہ کیا ہے کہ میگا پروجیکٹس میں ہونے والی کرپشن کی شفاف تحقیقات کی جائیں۔ خود پی ٹی آئی کے ووٹرز نے تسلیم کیا ہے کہ خیبرپختونخوا میں ترقیاتی فنڈز کرپشن کی نذر ہو رہے ہیں۔ علی امین خان اس وقت ’’لوٹ مار ایسوسی ایشن‘‘ کے مرکزی چیئرمین کے طور پر پہچانے جا رہے ہیں، جبکہ ان کی کابینہ نے جی ٹی روڈ پر سفر کرتے ہوئے پنجاب کی ترقی اور خوشحالی کا خود مشاہدہ کیا ہے۔

مریم نواز کی قیادت میں پنجاب کی ترقی

وزیر اطلاعات پنجاب نے کہا کہ وزیراعلیٰ مریم نواز نے پنجاب میں میرٹ، شفافیت اور گڈ گورننس کا عملی ماڈل پیش کیا ہے۔ پنجاب کے تمام چھوٹے بڑے منصوبے شفافیت کی بنیاد پر مکمل ہو رہے ہیں، اور ان منصوبوں پر کسی کو انگلی اٹھانے کی جرأت نہیں ہو سکتی۔ مریم نواز کی قیادت میں پنجاب ترقی، دیانتداری اور عوامی خدمت کی نئی مثالیں قائم کر رہا ہے، جبکہ خیبرپختونخوا میں صرف تقریروں اور نعرہ بازی کے سوا کچھ نظر نہیں آتا۔