پاکستان کو گزشتہ مالی سال کے دوران 14 ارب 14کروڑ ڈالرز کی غیرملکی فنڈنگ ملی

بیرونی فنڈنگ رپورٹ کااجراء

اسلام آباد (ڈیلی پاکستان آن لائن) وزارت اقتصادی امور نے بیرونی فنڈنگ کی رپورٹ جاری کردی ہے، جس میں کہا گیا ہے کہ گزشتہ مالی سال 25-2024 کے دوران 12 ارب 14کروڑ ڈالرز موصول ہوئے، جبکہ آئی ایم ایف کی 2 اقساط کے 2 ارب ڈالرز سے زائد ملاکر فنانسنگ 14 ارب 14 کروڑ ڈالرز بنتی ہے۔

یہ بھی پڑھیں: وزیرِ اعظم نے دنیا کو مستقبل میں پانی کی قلت سے بچانے کیلئے 6 نکاتی ایجنڈا تجویز کر دیا

حکومتی تخمینے اور پچھلے سال کی صورتحال

رپورٹ کے مطابق وفاقی حکومت نے گزشتہ مالی سال 25-2024 کے دوران 19 ارب 39 کروڑ ڈالرز کی بیرونی فنانسنگ کا تخمینہ لگایا تھا جبکہ اس سے پچھلےسال (مالی سال24-2023) کے دوران بیرونی فنڈنگ کا حجم 9 ارب 81 کروڑ ڈالرز رہا تھا۔ رپورٹ میں کہا گیا ہے کہ جون 2025 میں 5 ارب 25 کروڑ ڈالرز کی غیرملکی فنانسنگ حاصل ہوئی، جبکہ گزشتہ مالی سال 11 ارب 92 کروڑ ڈالرز کا غیرملکی قرضہ لیا گیا۔

یہ بھی پڑھیں: وزیراعظم شہبازشریف کی قومی قیادت کو دعوت ملتوی

گرانٹس اور غیر شامل رقوم

رپورٹ کے مطابق مالی سال میں 22 کروڑ ڈالرز کی گرانٹس موصول ہوئیں، تاہم وزارت اقتصادی امور نے رپورٹ میں سعودی عرب، متحدہ عرب امارات (یو اے ای)، چین کے رول اوور کو حصہ نہیں بنایا۔ اسی طرح گزشتہ مالی سال کی فنڈنگ میں سعودی عرب کے 5 ارب ڈالرز کا ڈیپازٹ بھی شامل نہیں۔ رپورٹ کے مطابق گزشتہ مالی سال کے دوران فنڈنگ میں چین سے 4 ارب ڈالرز کا سیف ڈیپازٹ بھی شامل نہیں کیا گیا۔