دریائے چناب اور جہلم سے ملحقہ ندی نالوں میں سیلاب کی وارننگ، متعلقہ محکموں کو الرٹ رہنے کا حکم

سیلاب کی وارننگ

لاہور (ڈیلی پاکستان آن لائن) پی ڈی ایم اے پنجاب نے دریائے چناب اور جہلم میں سیلاب کی وارننگ جاری کر دی ہے۔ ان دریاؤں میں نچلے سے درمیانے درجے کے سیلاب کی صورتحال کا خدشہ ہے۔ خاص طور پر 28 سے 31 جولائی کے دوران پانی کے غیر معمولی اضافے کی توقع کی جا رہی ہے۔

یہ بھی پڑھیں: وہ مسلم ملک جو ترکی اور اسرائیل میں خاموشی سے سفارتکاری کر رہا ہے۔

کمشنرز اور ڈپٹی کمشنرز کو الرٹ

پی ڈی ایم اے پنجاب نے کمشنر راولپنڈی، گوجرانوالہ، سرگودھا، فیصل آباد، ملتان اور ڈیرہ غازی خان ڈویژن کو الرٹ جاری کیا۔ اسی طرح گجرات، جہلم، منڈی بہاؤالدین، سرگودھا، خوشاب، جھنگ، خانیوال، ملتان، کوٹ ادو، مظفر گڑھ، سیالکوٹ، گوجرانوالہ، حافظ آباد اور چنیوٹ کے ڈپٹی کمشنرز کو بھی الرٹ کیا گیا ہے۔ ریلیف کمشنر پنجاب نبیل جاوید نے کسی بھی ممکنہ صورتحال کے بارے میں کمشنروں، ڈپٹی کمشنروں اور واسا حکام کو الرٹ رہنے کی ہدایات فراہم کی ہیں۔

یہ بھی پڑھیں: آذربائیجان کی یوم آزادی پر ترکیہ، پاکستان کے رہنماو¿ں کی شرکت دوستی کی عکاس ہے: الہام علیوف

ہنگامی اقدامات کی ہدایات

ریلیف کمشنر پنجاب نبیل جاوید نے متعلقہ محکموں کو الرٹ رہنے کی ہدایات دی ہیں۔ ان کا کہنا ہے کہ لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو سٹاک اور محکمہ ٹرانسپورٹ کو بھی الرٹ کیا گیا ہے۔ وزیر اعلیٰ پنجاب کی ہدایات کے تحت تمام انتظامات پیشگی مکمل رکھے جائیں۔ ایمرجنسی کنٹرول رومز میں عملے کو معین کیا جائے اور ریسکیو 1122 کی ڈائزاسٹر رسپانس ٹیموں کو ہائی الرٹ کیا جائے۔ عوام کو موجودہ صورتحال سے لمحہ بہ لمحہ آگاہ کیا جائے۔ دریاؤں کے پاٹ میں موجود مکانوں اور مویشیوں کے انخلا کو یقینی بنایا جائے۔ فلڈ ریلیف کیمپس میں خوراک، پینے کا صاف پانی اور دیگر سہولیات کی دستیابی کو یقینی بنایا جائے۔

عوامی احتیاط کی ضرورت

ڈائریکٹر جنرل پی ڈی ایم اے عرفان علی کاٹھیا نے عوام سے درخواست کی ہے کہ وہ جاری کردہ احتیاطی تدابیر پر عمل کریں اور ہنگامی انخلا کی صورت میں انتظامیہ سے تعاون کریں۔ حکومت پنجاب آپ اور آپ کے مال مویشیوں کا خیال رکھے گی۔