صورتحال ٹف ہے ، کسی سطح پر کوئی مذاکرات نہیں ہو رہے ،سلمان اکرم راجہ کے استعفے پر بانی پی ٹی آئی فیصلہ کریں گے:بیرسٹر گوہر

پی ٹی آئی کے چیئرمین کا استعفے کے معاملے پر اظہارِ خیال

راولپنڈی (ڈیلی پاکستان آن لائن) پاکستان تحریک انصاف (پی ٹی آئی) کے چیئرمین بیرسٹر گوہر خان نے کہا ہے کہ لوگ فلمیں نہ چلائیں، پارٹی عہدے سے استعفیٰ دینا سنجیدہ ایشو ہے۔ سلمان اکرم راجہ کے استعفے کے بارے میں سنا ہے لیکن ان کا بیان نہیں پڑھا۔ سلمان اکرم راجہ کے استعفے پر بانی پی ٹی آئی فیصلہ کریں گے، کوئی لیڈر پبلک میں کمنٹس نہ کرے۔

یہ بھی پڑھیں: بے حسوں کے قبرستان لاہور میں 68 افراد کی خود کشی کا نوحہ

میڈیا سے گفتگو

راولپنڈی میں اڈیالہ جیل کے باہر میڈیا سے گفتگو کرتے ہوئے انہوں نے کہا کہ سلمان اکرم راجہ سمیت کسی لیڈر کو پارٹی معاملات پر ٹوئٹ نہیں کرنا چاہیے۔ بدقسمتی سے پارٹی کے اندر سے کوئی نہ کوئی چیز باہر آتی ہے جس سے تنازع کھڑا ہوتا ہے۔ پارٹی کے اندر سے باتیں باہر آتی ہیں تو لوگ سمجھتے ہیں کہ اختلافات ہیں۔ بانی کی بھی واضح ہدایات ہیں کہ کوئی پارٹی لیڈر پبلک میں اپنا استعفیٰ پیش نہیں کرے گا۔

یہ بھی پڑھیں: سعودی وزیر خارجہ کا دورۂ روس، اسرائیل سے تعلقات کے حوالے سے صحافی کا سوال، کیا جواب دیا ؟ جانیے

ملاقات کی ممانعت

بیرسٹر گوہر نے کہا کہ آج بانی سے ملنے آیا تھا، لیکن پولیس نے روک دیا ہے۔ ملاقاتوں سے روکنا مناسب بات نہیں، میں ہمیشہ کہتا ہوں کہ مفاہمت ہونی چاہیے۔ ناجائز سزاؤں، نااہلیوں اور گرفتاریوں سے دوریاں بڑھیں گی۔

یہ بھی پڑھیں: راولپنڈی، لاہور، اسلام آباد سمیت 17 شہروں کے ماحولیاتی نمونوں میں پولیووائرس کی تصدیق

انتخابات میں حصہ لینے کا فیصلہ

سیاسی کمیٹی نے انتخابات میں حصہ لینے یا نہ لینے کا فیصلہ اگر کیا ہے تو میں اس میٹنگ میں نہیں تھا۔ بانی کی ہدایات اگر انتخابات میں حصہ نہ لینے کی ہیں تو بانی کی بات ہی حتمی ہوگی۔ ضمنی انتخابات میں جانے کے حوالے سے بانی پی ٹی آئی فیصلہ کریں گے۔

سیلاب کی تباہی

چیئرمین پی ٹی آئی نے یہ بھی کہا کہ سیلاب کی تباہی کی وجہ سے بونیر میں تھا۔ سیلاب کی تباہ کاریاں اللہ کی طرف سے آزمائش ہے۔ کے پی میں 10 ضلعے متاثر ہوئے ہیں۔ وفاق نے صرف 200 ٹینٹ، 5 جنریٹر اور 5 ڈی واٹرنگ پمپ دیئے ہیں۔ وفاقی حکومت کی امداد بہت کم ہے، حکومت کو دل کھول کے مدد کرنی چاہیے۔