اٹک میں تیل و گیس کا بڑا ذخیرہ دریافت کر لیا گیا

کراچی(ڈیلی پاکستان آن لائن) پاکستان پیٹرولیم لمیٹڈ (پی پی ایل) نے پنجاب کے ضلع اٹک میں تیل و گیس کی بڑی دریافت کا اعلان کیا ہے۔

یومیہ پیداوار کا تخمینہ

پی پی ایل اعلامیے میں بتایا گیا ہے کہ دریافت کنویں سے یومیہ 1469 بیرل تیل اور 2.56 ایم ایم سی ایف گیس حاصل ہو گی۔ یہ دریافت صوبہ پنجاب کے ضلع اٹک میں واقع ڈھوک سلطان-03 کنویں میں ہوئی ہے۔

اہم سنگ میل

اعلامیے میں کہا گیا ہے کہ ڈھوک سلطان بلاک میں ہونے والی تاریخی دریافت ناصرف پی پی ایل اور اس کے شراکت دار گورنمنٹ ہولڈنگز پرائیویٹ لمیٹڈ (جی ایچ پی ایل) کے لیے ایک اہم سنگ میل ہے، بلکہ پوٹھوہار خطے میں قدرتی طور پر فریکچرڈ کاربونیٹ میں تیل کی دوسری گہری دریافت بھی ہے۔ یہ کامیابی کمپنی کے عملے کی مہارت اور تکنیکی بالادستی کو ظاہر کرتی ہے۔

تحقیقات اور تکنیکی مہارت

یہ دریافت ارضیاتی، جیو طبیعاتی اور ریزروائر انجینئرنگ ڈیٹا کے تجزیوں اور انظمام کا نتیجہ ہے۔ اس کے ذریعے کنویں کے ڈیزائن کو بہتر بنا کر کھدائی کی دشواریوں پر قابو پایا گیا، جس سے وقت اور لاگت کی بچت ہوئی۔

کھدائی کا آغاز

پی پی ایل نے ڈھوک سلطان بلاک میں آپریٹر کی حیثیت سے 75 فیصد اور جی ایچ پی ایل 25 فیصد کاروباری شراکت کے ساتھ 18 جنوری 2025 کو ڈھوک سلطان-03 کی کھدائی کا آغاز کیا، جو 5815 میٹر کی گہرائی تک کی گئی۔