لیسکو نے سیلاب سے متاثرہ 67 فیڈرز میں سے 59 مکمل 8 جزوی طور پر بحال کر دیئے

لیسکو کی بجلی بحالی کا عمل

لاہور (طیبہ بخاری سے) لیسکو نے سیلاب سے متاثرہ علاقوں میں بجلی کی بحالی کے عمل میں نمایاں پیش رفت کی ہے۔ لیسکو ریجن میں سیلاب سے متاثرہ 67 فیڈرز میں سے 59 مکمل طور پر جبکہ 8 جزوی طور پر بحال ہو چکے ہیں۔ اس طرح 73 ہزار 734 متاثرہ صارفین میں سے 65 ہزار 721 کو بجلی فراہم کر دی گئی ہے، جو کل صارفین کا تقریباً 89.13 فیصد ہے۔

یہ بھی پڑھیں: جنوبی وزیرستان اور لکی مروت میں سیکیورٹی فورسز کے آپریشنز ، 8 خوارج جہنم واصل ، 2 گرفتار

علاقائی تفصیلات

لاہور میں 17 فیڈرز متاثر ہوئے جن میں سے 16 مکمل اور ایک جزوی طور پر بحال ہو چکے ہیں، جس کے نتیجے میں سیلاب سے متاثرہ 98 فیصد سے زائد صارفین کو بجلی فراہم کر دی گئی ہے۔ اوکاڑہ میں 15 متاثرہ فیڈرز میں سے 13 مکمل اور 2 جزوی بحال ہوئے ہیں، جہاں 65 فیصد صارفین کو بجلی فراہم ہو چکی ہے۔ شیخوپورہ میں تمام 10 متاثرہ فیڈرز مکمل طور پر بحال کر دیئے گئے ہیں اور تمام صارفین کو بجلی مہیا کر دی گئی ہے۔ قصور میں 16 متاثرہ فیڈرز میں سے 13 مکمل اور 3 جزوی طور پر بحال کیے گئے ہیں، جہاں اب تک 50 فیصد سے زائد صارفین کو بجلی فراہم کر دی گئی ہے۔ ننکانہ میں 9 متاثرہ فیڈرز میں سے 7 مکمل اور 2 جزوی طور پر بحال کر دیے گئے ہیں اور وہاں 88 فیصد صارفین کو بجلی فراہم ہو چکی ہے۔

لیسکو کی ٹیموں کی محنت

چیف ایگزیکٹو لیسکو انجینئر محمد رمضان بٹ نے کہا ہے کہ سیلاب کی اس ہنگامی صورتحال میں لیسکو کی ٹیمیں دن رات متاثرہ صارفین کی خدمت میں مصروف ہیں۔ ہماری اولین ترجیح یہ ہے کہ تمام صارفین کو جلد از جلد بجلی فراہم کی جائے۔ جن علاقوں میں تاحال بجلی بحال نہیں ہو سکی، وہاں بھی تیز رفتاری سے کام جاری ہے اور بہت جلد تمام متاثرہ فیڈرز مکمل طور پر بحال کر دیئے جائیں گے۔