صوبائی حکومتیں بلدیاتی نظام کو یرغمال بنا کر بیٹھی ہیں، پیپلز پارٹی کراچی کے عوام کے ۳،۳۶۰ ارب روپے کا حساب دے، حافظ نعیم الرحمان

حافظ نعیم الرحمان کی پریس کانفرنس

لاہور (ڈیلی پاکستان آن لائن) جماعت اسلامی کے امیر حافظ نعیم الرحمان نے کہا ہے کہ پاکستان پیپلز پارٹی کراچی کے عوام کے 3 ہزار 360 ارب روپے کا حساب دے۔ ان کا کہنا ہے کہ مرتضیٰ وہاب کے چہرے کے پیچھے جاگیردارانہ سیاست کار فرما ہے۔

یہ بھی پڑھیں: پیسوں کی خاطر پی ایس ایل چھوڑنے والے کوشل مینڈس نے آئی پی ایل ٹیم کو فائنل سے باہر کروادیا

بلدیاتی نظام اور قومی ٹیم کی ناکامی

منصورہ لاہور میں پریس کانفرنس کرتے ہوئے انہوں نے کہا کہ تمام صوبائی حکومتیں بلدیاتی نظام کو یرغمال بنا کر بیٹھی ہیں اور عوامی مسائل حل نہیں ہونے دیے جا رہے۔ انہوں نے پاک بھارت میچ میں شکست کی ذمہ داری قومی ٹیم پر نہیں بلکہ پاکستان کرکٹ بورڈ کی ناقص حکمت عملی پر عائد کی۔ کپتانوں کی بار بار تبدیلی نے ٹیم کے کھیل کو متاثر کیا اور یہ ناکامی براہِ راست بورڈ کی پالیسیوں کا نتیجہ ہے۔

یہ بھی پڑھیں: قومی بچت سکیموں کی شرح منافع میں کمی

فلسطین کے مسئلے پر بات چیت

فلسطین کے مسئلے پر گفتگو کرتے ہوئے حافظ نعیم الرحمان نے کہا کہ صرف فلسطینی ریاست کو تسلیم کرنا کافی نہیں، بلکہ دنیا کو اسرائیل کے مظالم کو روکنے کے لیے عملی اقدامات کرنا ہوں گے۔ گریٹر اسرائیل کے منصوبے میں سعودی عرب، لبنان اور شام تک شامل ہیں، اس لیے پاک سعودی عرب دفاعی معاہدہ خوش آئند ہے۔ تاہم یہ معاہدہ صرف دو ممالک تک محدود نہیں ہونا چاہیے بلکہ تمام اسلامی ممالک کو اس میں شامل کر کے ایک مشترکہ دفاعی اور معاشی بلاک تشکیل دینا چاہیے تاکہ امت مسلمہ کو مضبوط بنایا جا سکے۔

ملین مارچ اور کسانوں کے مسائل

امیر جماعت اسلامی نے اعلان کیا کہ یکم اکتوبر سے سات اکتوبر تک جماعت اسلامی ملک بھر میں اسرائیلی دہشت گردی کے خلاف ملین مارچ کے ذریعے فلسطینی عوام سے اظہار یکجہتی کرے گی۔ اس دوران جماعت اسلامی کسان تنظیموں کو بھی ایک پلیٹ فارم پر جمع کرے گی اور ان کے مسائل کے حل کے لیے مشاورت سے لائحہ عمل طے کیا جائے گا۔ حکومت سے مطالبہ کیا کہ وہ سیلاب سے متاثرہ کسانوں کی فوری امداد کرے۔