سیکرٹری اطلاعات و ثقافت پنجاب طاہر رضا ہمدانی کا بزنس فسیلیٹیشن سینٹر لاہور کا دورہ

سیکرٹری اطلاعات وثقافت پنجاب کا بزنس فسیلیٹیشن سینٹر لاہور کا دورہ

لاہور (ڈیلی پاکستان آن لائن) سیکرٹری اطلاعات وثقافت پنجاب طاہر رضا ہمدانی نے بزنس فسیلیٹیشن سینٹر لاہور کا دورہ کیا۔ صوبائی سیکرٹری نے بزنس فسیلیٹیشن سینٹر کے تمام کاؤنٹرز کا معائنہ کیا اور سینٹر کی ورکنگ اور آپریشنل امور کا جائزہ لیا۔ منیجر بزنس فسیلیٹیشن سینٹر عابد سلیمی نے ادارے کی کارکردگی کے بارے میں بریفنگ دی۔

یہ بھی پڑھیں: پاکستان جلد دوبارہ دنیا کی 24 ویں معیشت بن کر ابھرے گا: وزیر خارجہ اسحاق ڈار

کاروباری سہولیات کی فراہمی

سیکرٹری اطلاعات وثقافت پنجاب طاہر رضا ہمدانی نے اس موقع پر گفتگو کرتے ہوئے کہا کہ معاشی سرگرمیوں کے فروغ میں پنجاب کے 6 بزنس فسیلیٹیشن سینٹرز کلیدی کردار ادا کر رہے ہیں۔ کاروباری سہولت مراکز کے قیام سے سرمایہ کاری میں حائل رکاوٹیں دور ہوئی ہیں۔ 5 وفاقی اور 28 صوبائی محکمے ایک ہی چھت تلے سرمایہ کاروں کو ضروری سہولیات فراہم کر رہے ہیں اور ان سہولت مراکز سے مختلف کاروباری سرگرمیوں کے لیے صرف 15 دنوں میں این او سی جاری ہو رہے ہیں۔

کارکردگی کا جائزہ

سیکرٹری اطلاعات وثقافت پنجاب نے بزنس فسیلیٹیشن سینٹر کے کاؤنٹرز پر موجود مختلف محکموں کے نمائندوں سے ان کی ورکنگ کے بارے میں دریافت کیا۔ صوبائی سیکرٹری کو بریفنگ میں بتایا گیا کہ بزنس فسیلیٹیشن سینٹرز اب تک مختلف کاروباری سرگرمیوں کے لیے 56541 این او سی جاری کر چکے ہیں۔ این او سی کے حصول کے لیے 61712 درخواستیں موصول ہوئی ہیں اور بزنس فسیلیٹیشن سینٹرز میں 20814 افراد کو مشاورت فراہم کی گئی ہے۔ صوبائی سیکرٹری کو یہ بھی بتایا گیا کہ اب تک 83176 افراد نے ان 6 بزنس فسیلیٹیشن سینٹرز کا دورہ کیا ہے۔