جذبۂ خدمت کو سلام، چند دنوں میں 10 ہزار سے زائد افراد نے بطور سول ڈیفنس رضاکار رجسٹریشن کروا لی

پاکستانیوں کا جذبہ خدمت

لاہور (ڈیلی پاکستان آن لائن) پاکستانی قوم نے ہمیشہ مشکل کی گھڑی میں خود کو ایک باوقار اور متحد قوم ثابت کیا ہے۔ سیلاب متاثرین کی امداد و بحالی کیلئے بھی اہلیانِ وطن کے جذبہ خدمت، عزم اور حوصلے کو سلام، محکمہ داخلہ کے آن لائن پورٹل پر شہریوں کا نہایت مثبت اور پُرجوش رسپانس سامنے آیا ہے۔ چند ہی دنوں میں 10,700 سے زائد افراد نے بطور سول ڈیفنس رضاکار رجسٹریشن کروا لی ہے۔ مردوں کے شانہ بشانہ خواتین بھی بطور رضاکار رجسٹریشن کروا رہی ہیں اور تمام شعبہ ہائے زندگی سے تعلق رکھنے والے اور مختلف تعلیمی قابلیت کے حامل افراد رجسٹریشن کروا رہے ہیں۔ رجسٹریشن میں فیصل آباد پہلے، بہاولپور دوسرے اور راولپنڈی تیسرے نمبر پر آ گیا ہے۔

یہ بھی پڑھیں: گورنر سٹیٹ بینک نے عوام کو خوشخبری سنا دی

سیکرٹری داخلہ پنجاب کا خیرمقدم

سیکرٹری داخلہ پنجاب ڈاکٹر احمد جاوید قاضی نے سول ڈیفنس میں بطور رضاکار رجسٹریشن کروانے والے شہریوں کا خیرمقدم کیا ہے۔ ان کا کہنا ہے کہ سول ڈیفنس رضاکار ہر قسم کے ہنگامی حالات میں متاثرین کی امداد کرتے ہیں اور جذبۂ خدمت و ایثار سے لبریز نوجوان بڑی تعداد میں رجسٹریشن کروا رہے ہیں۔ یاد رہے کہ محکمہ داخلہ پنجاب نے سول ڈیفنس رضاکاروں کی رجسٹریشن کیلئے آن لائن پورٹل جاری کیا تھا جس کے بعد شہریوں کی بڑی تعداد نے اس میں دلچسپی کا اظہار کیا۔

یہ بھی پڑھیں: سلمان خان کی سابقہ گرل فرینڈ سومی علی کا چونکا دینے والادعوی

وزیر اعلیٰ پنجاب کی قیادت میں امدادی اقدامات

سیکرٹری داخلہ پنجاب نے بتایا کہ وزیر اعلیٰ پنجاب کی قیادت میں سیلاب متاثرین کی امداد و بحالی پر دن رات کام جاری ہے اور لاکھوں متاثرین، ان کی املاک اور مویشیوں کو محفوظ مقامات تک منتقل کیا گیا ہے۔ سول ڈیفنس نے اس دوران متاثرین کو ریسکیو کر کے کھانا، ادویات فراہم کرنے کے ساتھ محفوظ شیلٹر بھی مہیا کیے۔ حکومت پنجاب کے تمام متعلقہ ادارے متاثرین کی امداد و بحالی کیلئے فیلڈ میں سرگرم ہیں اور شہری بھی اپنی صلاحیت اور قابلیت کے مطابق بطور رضاکار متاثرین کی امداد کر رہے ہیں۔ پاکستانی قوم اپنے ہم وطنوں کی مدد کے اس عظیم مشن کا حصہ بن رہے ہیں۔

رضاکاروں کے لیے تعریفی اسناد

انہوں نے بتایا کہ بطور رضاکار خدمات سرانجام دینے والوں کو خصوصی تعریفی اسناد دی جائیں گی۔ یاد رہے کہ سول ڈیفنس میں بطور رضاکار رجسٹریشن کیلئے آن لائن پورٹل اب بھی کھلا ہے۔ رجسٹریشن کروانے پر متعلقہ اضلاع میں سول ڈیفنس انتظامیہ شہریوں سے خود رابطہ کر رہی ہے تاکہ ان کی قابلیت اور صلاحیت کے مطابق بہترین خدمات لی جا سکیں۔