عمرایوب کی اہلیہ سیاسی کارکن کی تعریف پر پورا اترتی ہیں اس لیے ٹکٹ دیا، سلمان اکرم

سلمان اکرم راجہ کا عمر ایوب کی اہلیہ کی حمایت میں بیان

اسلام آباد(ڈیلی پاکستان آن لائن) تحریک انصاف کے سیکرٹری جنرل سلمان اکرم راجہ ٹکٹ دیے جانے پر عمر ایوب کی اہلیہ کے دفاع میں سامنے آگئے۔

عمر ایوب کی اہلیہ کی سیاسی حیثیت

نجی ٹی وی چینل جیو نیوز کے مطابق قومی اسمبلی کے حلقہ این اے 18 میں عمر ایوب کی اہلیہ کو ٹکٹ دینے سے متعلق صحافی کے سوال پر سلمان اکرم نے کہا کہ کچھ معاملات مقامی سطح کے ہیں، عمر ایوب کا حلقہ پاکستان کا سب سے بڑا حلقہ ہے۔

انہوں نے کہا کہ عمر ایوب کی اہلیہ گزشتہ 20 سال سے بطور سیاسی ورکر کام کر رہی ہیں، علاقائی سیاست کی نگرانی بھی عمر ایوب کی اہلیہ ہی کرتی ہیں۔ یہ نہیں کہا جا سکتا کہ ان کا سیاست سے کوئی تعلق نہیں یا انہیں مسلط کیا جا رہا ہے، ان کی اہلیہ کا حق بنتا تھا جسے پارٹی نے تسلیم کیا۔

9 مئی کیسز کے بارے میں سوال

اس موقع پر صحافی نے سوال کیا کہ کیا عمر ایوب نے 9 مئی کیسز میں اپنی نااہلی کی سزا تسلیم کر لی؟

اس پر سلمان اکرم راجہ نے کہا کہ میری عمر ایوب یا ان کے وکیل سے اس حوالے سے کوئی بات نہیں ہوئی، اس کے محرکات میرے علم میں نہیں ہیں، مجھے علم نہیں ہے کہ انہوں نے ایسا کیوں کیا، اس لیے میں اس پر بات نہیں کروں گا۔