سلیکٹر کا نامناسب رویہ اور فحش سوالات، سابق بنگلادیشی خاتون کرکٹر کے الزامات پر تحقیقات کا فیصلہ

تحقیقات کا آغاز

ڈھاکہ (ڈیلی پاکستان آن لائن) بنگلادیشی کرکٹ بورڈ نے بنگلادیش کی سابق فاسٹ بولر جہاں آرا عالم کے لگائے گئے الزامات پر تحقیقات کا فیصلہ کر لیا ہے۔

یہ بھی پڑھیں: خصوصی اقتصادی زونز اور ٹیکنالوجی زونز کے لیے ٹیکس مراعات ختم کرنے کا فیصلہ

الزامات کی تفصیلات

سابق فاسٹ بولر جہاں آرا عالم نے اپنے ایک انٹرویو کے دوران ویمن ٹیم کے سلیکٹر اور منیجر پر الزامات لگاتے ہوئے کہا کہ سابق سلیکٹر ون ڈے ورلڈکپ 2022 کے دوران نامناسب انداز میں ان کے پاس آئے تھے۔ جہاں آرا نے الزام لگایا کہ ان سے فحش سوالات کیے گئے، جبکہ اس معاملے پر بی سی بی آفیشلز کو بھی اسی وقت آگاہ کیا گیا تھا، تاہم آفیشلز کا رویہ بھی نامناسب تھا۔

یہ بھی پڑھیں: 190ملین پاؤنڈ ریفرنس؛ مسلسل عدم پیشی پر بشریٰ بی بی کے ناقابل ضمانت وارنٹ گرفتاری جاری

بی سی بی کا ردعمل

دوسری جانب ان الزامات پر بنگلادیشی کرکٹ بورڈ کا ردعمل بھی سامنے آ گیا ہے۔ کرکٹ بورڈ کے مطابق مقامی میڈیا میں قومی ٹیم کی ایک سابق رکن کے ٹیم سے جڑے شخص پر مس کنڈکٹ کے الزامات پڑھے، یہ ایک حساس معاملہ ہے۔

بی سی بی کے مطابق جہاں آرا عالم کے لگائے گئے الزامات کی تحقیقات کی جائے گی جس کے لیے ایک کمیٹی تشکیل دی گئی ہے جو 15 روز میں تحقیقات مکمل کرکے سفارشات پیش کرے گی۔ بورڈ ایسے معاملات کو سنجیدگی سے لیتا ہے جبکہ تحقیقات مکمل ہونے پر ایکشن بھی لیتا ہے۔

یہ بھی پڑھیں: میکسویل کی شاندار بیٹنگ جس نے میچ پاکستانی اننگز سے پہلے ہی ختم کر دیا

پچھلے الزامات

واضح رہے کہ جہاں آرا عالم نے اس سے قبل ایک انٹرویو میں بنگلا دیش ویمن کپتان نگار سلطانہ پر ساتھی کھلاڑیوں کے ساتھ مارپیٹ کے الزامات لگائے تھے، تاہم بی سی بی نے ان کے مارپیٹ کے الزامات کو بے بنیاد قرار دیا تھا۔

جہاں آرا عالم کا پس منظر

جہاں آرا عالم 135 وائٹ بال میچز میں بنگلا دیش کی نمائندگی کر چکی ہیں، جبکہ ان دنوں وہ آسٹریلیا میں رہائش پذیر ہیں۔