اگر جلد بارش نہ ہوئی تو تہران کو خالی کرنے کی نوبت آ سکتی ہے: ایرانی صدر مسعود پزشکیان نے خبردار کر دیا

تہران (ڈیلی پاکستان آن لائن) ایران کے صدر مسعود پزشکیان نے خبردار کیا ہے کہ اگر ملک میں جلد بارش نہ ہوئی تو دارالحکومت تہران کو شدید آبی بحران کا سامنا کرنا پڑ سکتا ہے، جس کے نتیجے میں شہر کو خالی کرانے کی نوبت بھی آسکتی ہے۔

یہ بھی پڑھیں: ڈی آئی خان میں سیکیورٹی فورسز کا آپریشن، 2 خوارج ہلاک

معاشی، ماحولیاتی اور سماجی بحرانوں کا مقابلہ

’’جیو نیوز‘‘ کے مطابق مغربی ایران کے شہر سَنندج کے دورے کے دوران گفتگو کرتے ہوئے صدر مسعود پزشکیان نے کہا کہ حکومت ایک ساتھ معاشی، ماحولیاتی اور سماجی بحرانوں سے نمٹنے کی کوشش کر رہی ہے۔ ایرانی صدر نے قحط سالی کے باعث پیدا ہونے والے پانی کے بحران کو ملک کے سنگین ترین قدرتی چیلنجز میں سے ایک قرار دیا۔ ان کا کہنا تھا کہ "اگر بارش نہ ہوئی تو اگلے ماہ تہران میں پانی کی فراہمی محدود کرنی پڑے گی، اگر خشک سالی جاری رہی تو ہم پانی سے محروم ہو جائیں گے اور شہر کو خالی کرانا پڑے گا۔"

یہ بھی پڑھیں: بانی پی ٹی آئی کیلئے کوئی ریلیف نہیں دیکھ رہا: سینیٹر فیصل واوڈا

پانی اور توانائی کے وسائل کا انتظام

ایرانی صدر نے پانی اور توانائی کے وسائل کے بہتر انتظام اور تحفظ کی فوری ضرورت پر زور دیا اور موجودہ صورتحال کو "انتہائی تشویشناک" قرار دیا۔

تہران میں پانی کی فراہمی کی صورت حال

خیال رہے کہ گزشتہ ہفتے تہران واٹر اتھارٹی کے سربراہ بہزاد پارسا نے کہا تھا کہ اگر خشک موسم برقرار رہا تو ڈیموں میں موجود پانی صرف 2 ہفتوں تک ہی شہر کی ضرورت پوری کر سکے گا۔