پاکستان ایک آزاد ملک، قرضوں میں نہیں پھنسنا چاہیے: امریکی ناظم الامور

امریکی ناظم الامور کی پاکستان کے حوالے سے گفتگو

اسلام آباد (ڈیلی پاکستان آن لائن) پاکستان میں امریکی ناظم الامور نٹیلی اے بیکر نے کہا ہے کہ پاکستان ایک آزاد ملک ہے اور اسے کسی ملک کے قرضوں کے چنگل میں نہیں پھنسنا چاہیے۔ پاکستان کو اپنے نجکاری پروگرام پر بھرپور عمل کرنا چاہیے۔

آئی ایم ایف کے اصلاحاتی پروگرام کی اہمیت

نجی ٹی وی چینل دنیا نیوز کے مطابق، امریکی ناظم الامور نیٹلی اے بیکر نے ایوانِ صدر میں اخبار نویسوں سے غیر رسمی گفتگو کرتے ہوئے کہا کہ آئی ایم ایف کے اصلاحاتی پروگرام پر مکمل عملدرآمد سے ہی پاکستان کی اقتصادی حکمت عملی کامیاب ہوگی۔ آئی ایم ایف پاکستان میں ایسی معاشی اصلاحات چاہتا ہے جو اسے بہتر اور پائیدار معیشت بنانے کا باعث بنیں۔ ورلڈ بینک بھی پاکستان کے ساتھ مؤثر انداز میں تعاون کر رہا ہے۔

پاکستان کی خودمختاری اور امریکی تعاون

انہوں نے کہا ہے کہ میں پاکستان کے مختلف شہروں میں جا چکی ہوں، ابھی میں آزاد کشمیر نہیں گئی، میں جانا چاہتی ہوں۔ پاکستان کے ساتھ امریکا کا پہلے ہی اقتصادی میدان میں تعاون بہت اچھا چل رہا ہے۔ پاکستان کی خودمختاری امریکا کے لیے نہایت اہم ہے اور امریکا بڑے دل سے پاکستان کی مدد کر رہا ہے۔

پاکستان اور چین کے تعلقات

پاکستان کے چین کے ساتھ قریبی تعلقات سے متعلق سوال کے جواب میں انہوں نے کہا کہ پاکستان ایک آزاد اور خودمختار ملک ہے جو دنیا کے کسی بھی ملک کے ساتھ تعلقات رکھ سکتا ہے لیکن اسے اپنی معاشی خودمختاری اور مفادات کا محتاط انداز میں تحفظ کرنا ہوگا۔ کوئی بھی ایسا منصوبہ جو کسی بھی ملک کے لیے قرض کے جال (Trap Debt) کا باعث بنے پوری دنیا کے لیے تشویش کا باعث ہے۔

صدر ٹرمپ کا ممکنہ دورہ پاکستان

نیٹلی اے بیکر نے مزید کہا ہے کہ واشنگٹن کو پاکستان اور چین کے تعلقات کی حساس نوعیت کا مکمل ادراک ہے۔ صدر ڈونلڈ ٹرمپ کو جیسے ہی اپنی مصروف بین الاقوامی ذمہ داریوں سے وقت ملا، وہ پاکستان کا دورہ کریں گے۔ یہ دورہ جلد متوقع ہے اور صدر ٹرمپ امن کے داعی ہیں۔ پاکستان نے ان کے نام کو نوبل انعام کے لیے درست طور پر تجویز کیا۔