تمام مذہبی برادریوں کے حقوق آئین کے تحت محفوظ ہیں: اعظم نذیر تارڑکی نیدرلینڈز کے سفیر سے گفتگو

وفاقی وزیر انسانی حقوق کی ملاقات

اسلام آباد(ڈیلی پاکستان آن لائن) وفاقی وزیر برائے انسانی حقوق سینیٹر اعظم نذیر تارڑ نے مملکتِ نیدرلینڈز کے سفیر ہائی ایکسی لینسی رابرٹ یان سیگرٹ سے ملاقات کی۔ اس ملاقات میں انسانی حقوق کے فروغ اور تحفظ سے متعلق جاری اقدامات پر تبادلۂ خیال کیا گیا اور دوطرفہ تعاون کو مزید مضبوط بنانے پر گفتگو کی گئی۔

یہ بھی پڑھیں: کوهستان مالی اسکینڈل: تحریک انصاف کے رہنما اعظم سواتی نیب میں پیش ہوگئے

نیدرلینڈز کی معاونت کا اعتراف

وزارت انسانی حقوق سے جاری پریس ریلیز کے مطابق وفاقی وزیر نے سفیر کا خیرمقدم کرتے ہوئے پاکستان کی انسانی حقوق کے شعبے میں ترجیحات کی تکمیل کے لیے نیدرلینڈز کی مستقل معاونت اور دلچسپی کو سراہا۔ دونوں فریقین نے مساوات، شمولیت، اور تمام شہریوں کی فلاح و بہبود کے فروغ کے مشترکہ عزم کا اعادہ کیا۔

یہ بھی پڑھیں: سندھ کے تمام اسپتالوں میں ایمرجنسی نافذ، عملے کی چھٹیاں منسوخ

انسانی حقوق کے ایجنڈے پر تعاون

سفیر نے انسانی حقوق کے ایجنڈے پر عملدرآمد کے حوالے سے پاکستان کی کاوشوں کو سراہا، خاص طور پر آئینی ضمانتوں، بالخصوص مذہبی آزادی اور عقائد کی آزادی کے فروغ کے لیے حکومتی عزم کی تعریف کی۔ وفاقی وزیر نے پاکستان کی متنوع اور شمولیتی سماج کا حوالہ دیتے ہوئے بتایا کہ ملک میں تمام مذہبی برادریوں کے حقوق آئینِ پاکستان کے تحت محفوظ ہیں۔

نیشنل ایکشن پلان برائے انسانی حقوق

وفاقی وزیر نے نیشنل ایکشن پلان برائے انسانی حقوق پر پیش رفت سے بھی آگاہ کیا، جو پالیسی اصلاحات، انصاف تک رسائی میں بہتری، بین الاقوامی معاہدوں پر عملدرآمد، اور انسانی حقوق کے اداروں کی تقویت جیسے اقدامات کا احاطہ کرتا ہے۔