اسلام آباد ائیرپورٹ پر غیر ملکی ائیر لائن کا طیارہ لینڈنگ کے دوران ہولناک حادثے سے بچ گیا

خطرناک حادثے سے بچاؤ

اسلام آباد(ڈیلی پاکستان آن لائن) اسلام آباد ائیرپورٹ پر غیر ملکی ایئر لائن کا طیارہ لینڈنگ کے دوران ہولناک حادثے سے بچ گیا۔ پاکستان ائیرپورٹس اتھارٹی کے ذرائع کے مطابق ایئر ٹریفک کنٹرولر کے بروقت اقدام نے طیارے کو بند رن وے پر لینڈنگ کرنے سے روکا۔

یہ بھی پڑھیں: اگر پاک بھارت جنگ چھڑ جائے تو امریکا کو دونوں کے ساتھ کسی تجارتی معاہدے میں دلچسپی نہیں ہوگی، ٹرمپ

واقعے کی تفصیلات

جیو نیوز کے مطابق سعودی ایئرلائن کی پرواز نمبر 728 جدہ سے اسلام آباد پہنچی تھی۔ اسلام آباد ائیرپورٹ کا رن وے 28 لیفٹ مرمت کے لیے بند ہے۔ پاکستان ائیرپورٹس اتھارٹی نے رن وے 28 لیفٹ بند ہونے اور رن وے 28 رائٹ کھلے ہونے کا نوٹم بھی جاری کیا ہوا ہے۔

یہ بھی پڑھیں: وفاقی وزیرداخلہ محسن نقوی کی میرانشاہ روڈ پر اسسٹنٹ کمشنر کے قافلے پر فتنہ الخوارج کے حملے کی پرزور مذمت

غلط رن وے کی معلومات

سعودی ایئرلائن کے پائلٹ نے لینڈنگ اپروچ 28 رائٹ کے بجائے 28 لیفٹ کے بند رن وے کی بنائی۔ کنٹرول ٹاور پر موجود ایئر ٹریفک کنٹرولر نے طیارے کے پائلٹ کو غلط رن وے پر ہونے کا بتایا۔ غیر ملکی ایئرلائن کا پائلٹ آخر وقت تک کہتا رہا کہ وہ ٹھیک رن وے پر ہے۔ ایئر ٹریفک کنٹرولر نے عین وقت پر پائلٹ کو لینڈنگ سے روک کر دوبارہ چکر لگانے کو کہا۔

محفوظ لینڈنگ

دوسری کوشش میں سعودی ایئرلائن کے بوئنگ 777 طیارے نے درست رن وے پر لینڈ کیا۔ جس وقت طیارے نے 28 لیفٹ پر لینڈنگ اپروچ بنائی، اس وقت رن وے پر بڑی تعداد میں لوگ اور گاڑیاں موجود تھیں۔ غلط رن وے پر لینڈنگ ہو جاتی تو سنگین حادثہ پیش آسکتا تھا۔ سعودی ایئرلائن کے بوئنگ 777 طیارے میں سیکڑوں مسافر موجود تھے۔ ترجمان کا کہنا ہے کہ پاکستان ائیرپورٹس اتھارٹی نے واقعے کا نوٹس لے لیا ہے۔