پنجاب حکومت کا غیر قانونی پتنگ بازی پر نوٹس، انتظامیہ کو فوری اور سخت ایکشن کا حکم جاری

پنجاب میں پتنگ بازی پر پابندی

لاہور (ڈیلی پاکستان آن لائن) حکومتِ پنجاب نے صوبہ کے بعض علاقوں میں غیر قانونی پتنگ بازی اور اس کے نتیجے میں راہگیروں کے زخمی ہونے کے واقعات کا سختی سے نوٹس لیتے ہوئے پنجاب میں پتنگ بازی کی ممانعت کے قانون پر سختی سے عملدرآمد کی ہدایت کی ہے۔ محکمہ داخلہ نے پنجاب بھر میں کمشنرز، ڈپٹی کمشنرز، آر پی اوز، سی پی اوز، ڈی پی اوز کو اس ضمن میں مراسلہ جاری کر دیا۔

یہ بھی پڑھیں: کراچی میں پسند کی شادی کرنے والی لیڈی ڈاکٹر نے شوہر کے رویے سے دلبرداشتہ ہوکر خودکشی کرلی

کائٹ فلائنگ ریگولیشنز بل 2025

ترجمان محکمہ داخلہ پنجاب کے مطابق مراسلے میں واضح کیا گیا ہے کہ صوبہ بھر میں ’’کائٹ فلائنگ ریگولیشنز بل 2025‘‘ کے تحت پتنگ سازی اور بازی پر پابندی عائد ہے۔ صوبائی کابینہ نے قانون کے مطابق صرف 6، 7، 8 فروری کو لاہور میں محدود پیمانے پر بسنت کی اجازت دی جس کے حوالے سے رجسٹریشن کی جا رہی ہے۔ مقررہ وقت سے قبل پنجاب میں کسی بھی مقام پر پتنگ سازی یا پتنگ بازی پر مکمل پابندی عائد ہے۔ غیر قانونی پتنگ بازی انسانی جانوں اور عوامی تحفظ کیلئے سنگین خطرہ ہے۔ غیر قانونی پتنگ بازی کے باعث راہگیروں کے زخمی ہونے کے واقعات رپورٹ ہوئے جو تشویشناک ہیں۔

یہ بھی پڑھیں: لاہور میں سموگ کے نئے سپیل کا خطرہ، ریڈ الرٹ جاری

انسانی جانوں کا تحفظ

ترجمان نے بتایا کہ انسانی جانوں کا تحفظ حکومت پنجاب کی اولین ترجیح ہے، اس لیے انسانی جانوں کیلئے خطرہ بننے والی پتنگ بازی کی کسی صورت اجازت نہیں دی جا سکتی۔ انہوں نے واضح کیا کہ صوبائی کابینہ کی جانب سے جشن بہاراں کے دوران ثقافتی سرگرمی کے طور پر محفوظ بسنت کی اجازت دی گئی۔ 6، 7، 8 فروری کو لاہور میں محدود پیمانے پر بسنت کے دوران بھی تندی، دھاتی ڈور، مانجھا لگی ڈور کے استعمال کی کسی صورت اجازت نہیں ہو گی۔ ترجمان نے بتایا کہ بغیر اجازت پتنگ بازی اور فروخت کرنے والے بھاری جرمانے اور طویل قید کی سزا کاٹیں گے۔

بلا امتیاز کارروائی

محکمہ داخلہ پنجاب نے مراسلے میں ہدایت کی ہے کہ پتنگ بازی میں ملوث افراد کے خلاف بلا امتیاز کارروائی عمل میں لائی جائے۔ پتنگ بنانے والوں، پتنگ بازی کا سامان فراہم کرنے والوں اور پتنگ بازی میں ملوث افراد کی گرفتاری عمل میں لائی جائے اور تمام کارروائیاں ’’کائٹ فلائنگ ریگولیشنز بل 2025‘‘ کے مطابق کی جائیں۔ یہ بات واضح ہے کہ حکومتی اجازت کے بغیر پتنگ سازی اور پتنگ بازی مکمل طور پر غیر قانونی ہے۔ ترجمان نے بتایا کہ تمام اضلاع ہدایات پر عملدرآمد کی رپورٹ محکمہ داخلہ پنجاب کو ارسال کریں گے۔