بنگلہ دیشی فوج میں اعلیٰ سطح پر بڑی تبدیلیاں، چیف آف جنرل سٹاف کی تبدیلی، بھارت میں تعینات دفاعی مشیر کی ترقی

ڈھاکہ (مانیٹرنگ ڈیسک) خالدہ ضیاء کے صاحبزادے طارق رحمان کے وزارت عظمیٰ کا چارج سنبھالنے کے چند روز بعد ہی بنگلہ دیش کی آرمی میں اعلیٰ سطح پر بڑی تبدیلیاں کر دی گئیں۔

نئی تعیناتیوں کی تفصیلات

غیر ملکی میڈیا کے مطابق آرمی ہیڈ کوارٹرز کی جانب سے جاری مراسلے میں کہا گیا ہے کہ بھارت میں تعینات دفاعی مشیر بریگیڈئیر جنرل محمد حفیظ الرحمان کو ترقی دے کر میجر جنرل بنا دیا گیا ہے اور انہیں 55 انفنٹری ڈویژن کا جنرل آفیسر کمانڈنگ تعینات کر کے فوری وطن واپس بلا لیا گیا ہے۔ اس کے علاوہ، لیفٹیننٹ جنرل محمد معین الرحمان کو چیف آف جنرل سٹاف تعینات کر دیا گیا ہے۔

مزید اہم تقرریاں

’’جیو نیوز‘‘ کے مطابق میجر جنرل قیصر رشید چوہدری کو ڈائریکٹر جنرل آف فورسز انٹیلی جنس تعینات کر دیا گیا ہے جبکہ میجر جنرل محمد جہانگیر عالم کو وزارت خارجہ میں سفیر لگا دیا گیا ہے۔ لیفٹیننٹ جنرل میر مشفیق الرحمان کو آرمڈ فورسز ڈویژن میں پرنسپل سٹاف آفیسر تعینات کر دیا گیا ہے جبکہ ان سے پہلے پی ایس او رہنے والے لیفٹیننٹ جنرل ایس ایم قمر الحسن کی خدمات وزارت خارجہ کے سپرد کر دی گئی ہیں۔