اب تک 10 مرتبہ میری ریڑھی اٹھائی جا چکی ہے، رمضان کے مہینے میں ایم سی ایل کی کارروائی پر اپنے بچوں کی واحد کفیل ماں کی وزیر اعلیٰ پنجاب سے انصاف کی اپیل
انسانیت سوز صورتحال
لاہور(ڈیلی پاکستان آن لائن) ماہِ رمضان کی بابرکت گھڑیوں میں لاہور کے علاقے ملتان روڈ چھپڑ سٹاپ پر میٹروپولیٹن کارپوریشن لاہور کے عملے کی جانب سے غریب سبزی فروشوں کے خلاف کارروائیوں نے انسانیت سوز صورتحال اختیار کر لی۔ ایک متاثرہ خاتون جو اپنے معصوم بچوں کی واحد کفیل ہے نے روزے کی حالت میں دہائی دیتے ہوئے انتظامیہ کے رویے پر شدید احتجاج کیا ہے۔
یہ بھی پڑھیں: چیکنگ کے نام پر پولیس اہلکار وں کے ہاتھوں دوشیزہ کی مبینہ تذلیل، لڑکی نے بھانڈا پھوڑ دیا
متاثرہ خاتون کا احتجاج
متاثرہ خاتون کا کہنا ہے کہ وہ محنت مزدوری کر کے اپنے گھر کا چولہا جلاتی ہے لیکن ایم سی ایل کا عملہ مسلسل اس پر ظلم کر رہا ہے۔ خاتون کے مطابق اب تک 10 مرتبہ اس کا سامان اور ریڑھی اٹھا کر لے جائی جا چکی ہے جو کبھی واپس نہیں کی گئی۔ جب وہ اپنے حق کے لیے دفاتر کا رخ کرتی ہے تو اسے انصاف کے بجائے دھکے دیے جاتے ہیں۔ روزے کی حالت میں کلمہ پڑھ کر فریاد کرنے والی اس ماں نے سوال اٹھایا کہ کیا قانون صرف کمزور کے لیے ہے؟
یہ بھی پڑھیں: مصطفی قتل کیس، ملزم ارمغان کے خلاف ایف آئی اے میں پہلا مقدمہ درج
جماعت اسلامی کا موقف
صدر پبلک ایڈ کمیٹی جماعت اسلامی لاہور قیصر شریف نے کہا کہ وہ ان مظلوموں کے ساتھ کھڑے ہیں اور ان کا جائز حق دلوانے تک جدوجہد جاری رکھیں گے۔ انہوں نے اسے "رمضان میں روزگار چھیننے کا ظلمِ عظیم" قرار دیا ہے۔ جماعت اسلامی اور متاثرہ شہریوں نے وزیراعلیٰ پنجاب مریم نواز شریف سے پرزور مطالبہ کیا ہے کہ اس مظلوم خاتون اور دیگر سبزی فروشوں کے خلاف ہونے والے ناروا سلوک کا فوری نوٹس لیا جائے۔
یہ بھی پڑھیں: پہلا ٹی ٹوئنٹی، پاکستان نے آسٹریلیا کو جیت کے لیے 169 رنز کا ہدف دے دیا
حکومت کی ذمہ داری
ذمہ دار افسران اور عملے کے خلاف سخت کارروائی کی جائے۔ غریب ریڑھی بانوں کو عزت کے ساتھ حلال رزق کمانے کا تحفظ فراہم کیا جائے۔ مظلوم شہریوں کا کہنا ہے کہ ایک طرف حکومت ریلیف پیکجز کی بات کرتی ہے اور دوسری طرف سرکاری ادارے غریب کا واحد ذریعہ معاش چھین رہے ہیں، جو کہ حکومت کی ساکھ پر ایک بڑا سوالیہ نشان ہے۔
