ایران نے آبنائے ہرمز میں بارودی سرنگیں بچھانا شروع کردیں، سی این این

ایران کی بارودی سرنگیں بچھانے کی اطلاعات

تہران (ڈیلی پاکستان آن لائن) امریکی انٹیلی جنس سے واقف ذرائع کے مطابق ایران نے دنیا کے سب سے اہم توانائی گزرگاہ سمجھے جانے والے آبنائے ہرمز میں بارودی سرنگیں بچھانا شروع کر دی ہیں۔ اس آبی راستے سے دنیا کے تقریباً پانچویں حصے کے برابر خام تیل کی ترسیل ہوتی ہے، اس لیے یہاں کسی بھی قسم کی کشیدگی عالمی توانائی منڈیوں پر فوری اثر ڈال سکتی ہے۔

یہ بھی پڑھیں: خاتون کو جنات کی جانب سے اغوا کرنے کا مقدمہ، پولیس افسران نے بازیابی کیلئے سرجوڑ لیے

سرنگوں کی تعداد اور خطرات

سی این این کے مطابق ابھی تک سرنگیں محدود تعداد میں بچھائی گئی ہیں اور گزشتہ چند دنوں کے دوران صرف چند درجن بارودی سرنگیں پانی میں ڈالی گئی ہیں۔ تاہم انٹیلی جنس رپورٹوں کے مطابق ایران کے پاس اب بھی اپنی چھوٹی کشتیوں اور بارودی سرنگیں بچھانے والے وسائل کا تقریباً 80 سے 90 فیصد حصہ موجود ہے، جس کا مطلب ہے کہ اگر ایران چاہے تو اس اہم آبی راستے میں سینکڑوں مزید سرنگیں بچھانے کی صلاحیت رکھتا ہے۔

یہ بھی پڑھیں: ایشیا کپ نہ کھیلنے کی خبروں پر بھارتی کرکٹ بورڈ کا موقف بھی سامنے آ گیا

پاسدارانِ انقلاب کی نگرانی

رپورٹس کے مطابق ایران کی پاسدارانِ انقلاب فورس اب عملاً آبنائے ہرمز کے انتظام اور کنٹرول میں مرکزی کردار ادا کر رہی ہے اور روایتی ایرانی بحریہ کے ساتھ مل کر اس علاقے کی نگرانی کر رہی ہے۔ امریکی میڈیا کے مطابق پاسدارانِ انقلاب کے پاس ایسی صلاحیت موجود ہے کہ وہ سرنگیں بچھانے والی کشتیوں، بارودی مواد سے بھری تیز رفتار کشتیوں اور ساحل سے داغے جانے والے میزائل سسٹمز کے ذریعے اس آبی راستے کو ایک انتہائی خطرناک جنگی زون میں تبدیل کر سکتی ہے۔

یہ بھی پڑھیں: ایران نے دوبارہ جوہری تنصیبات کی تعمیر کا اعلان کردیا

امریکی حکام کا ردعمل

اس سے قبل پاسدارانِ انقلاب کی جانب سے خبردار کیا گیا تھا کہ اگر کوئی جہاز آبنائے ہرمز سے گزرنے کی کوشش کرے گا تو اسے نشانہ بنایا جا سکتا ہے۔ جنگ شروع ہونے کے بعد سے اس راستے کو عملاً بند تصور کیا جا رہا ہے اور بعض ذرائع نے اسے جہازوں کے لیے “موت کی وادی” قرار دیا ہے کیونکہ یہاں سے گزرنا انتہائی خطرناک سمجھا جا رہا ہے۔

امریکی حکام کے مطابق اب تک امریکی بحریہ نے کسی تجارتی جہاز کو آبنائے ہرمز سے باقاعدہ اسکارٹ فراہم نہیں کیا۔ تاہم امریکی صدر ڈونلڈ ٹرمپ نے پیر کے روز کہا تھا کہ ان کی انتظامیہ اس معاملے میں مختلف آپشنز پر غور کر رہی ہے تاکہ جہازوں کو محفوظ راستہ فراہم کیا جا سکے۔

یہ بھی پڑھیں: دو ماہ کے دوران کوئٹہ میں جرائم کی شرح میں 70 فیصد تک کمی واقع ہوئی ہے، وزیر اعلیٰ بلوچستان میر سرفراز بگٹی

ٹرمپ کا متنازع بیان

منگل کو سوشل میڈیا پلیٹ فارم ٹروتھ سوشل پر اپنے بیان میں ٹرمپ نے کہا کہ اگر ایران نے آبنائے ہرمز میں بارودی سرنگیں بچھائی ہیں تو انہیں فوری طور پر ہٹا دیا جائے۔ انہوں نے کہا کہ اگر سرنگیں موجود ہیں اور انہیں فوراً نہ ہٹایا گیا تو ایران کو ایسے فوجی نتائج کا سامنا کرنا پڑے گا جو اس سے پہلے کبھی نہیں دیکھے گئے۔ تاہم انہوں نے یہ بھی کہا کہ اگر ایران ان سرنگوں کو ہٹا دیتا ہے تو یہ کشیدگی کم کرنے کی سمت میں ایک بڑا قدم ہوگا۔

یہ بھی پڑھیں: پاکستان کے معدنی ذخائر اعلیٰ عالمی معیار کے ہیں جو 2 لاکھ 30 ہزار مربع میل پر محیط ہیں، امریکی جریدے کا اعتراف

عالمی توانائی مارکیٹ کی تشویش

عالمی توانائی منڈی کے لیے یہ صورتحال انتہائی تشویشناک سمجھی جا رہی ہے کیونکہ اطلاعات کے مطابق خلیج فارس میں تقریباً ڈیڑھ کروڑ بیرل یومیہ خام تیل اور ساڑھے چار ملین بیرل یومیہ ریفائن شدہ ایندھن کی ترسیل متاثر ہو کر رکی ہوئی ہے۔ عراق اور کویت جیسے ممالک کے پاس اپنے تیل کو عالمی منڈیوں تک پہنچانے کے لیے آبنائے ہرمز کے علاوہ کوئی متبادل راستہ موجود نہیں۔

جی سیون کا عندیہ اور تیل کی قیمتوں میں اتار چڑھاؤ

اسی دوران بڑے صنعتی ممالک کے گروپ جی سیون نے عندیہ دیا ہے کہ اگر عالمی منڈی میں قلت بڑھتی ہے تو وہ اپنے اسٹریٹیجک ذخائر سے مزید تیل جاری کرنے پر غور کر سکتے ہیں تاکہ ممکنہ بحران کو کم کیا جا سکے۔

آبنائے ہرمز میں صورتحال کے باعث منگل کے روز عالمی تیل کی قیمتوں میں شدید اتار چڑھاؤ دیکھا گیا۔ خام تیل کی فی بیرل قیمت بعض اوقات 90 ڈالر سے اوپر چلی گئی جبکہ کچھ ہی دیر بعد 80 ڈالر سے نیچے بھی آ گئی، جس سے واضح ہوا کہ اس اہم آبی راستے میں پیدا ہونے والی غیر یقینی صورتحال عالمی توانائی منڈی کو شدید متاثر کر رہی ہے۔