بے مثال قربانیوں کی بدولت آج ہم ایک آزاد ریاست میں سانس لے رہے ہیں: سپیکر قومی اسمبلی

یومِ پاکستان کی مبارکباد

اسلام آباد (ڈیلی پاکستان آن لائن) سپیکر قومی اسمبلی سردار ایاز صادق نے یومِ پاکستان کے تاریخی موقع پر قوم کو مبارکباد پیش کرتے ہوئے کہا ہے کہ 23 مارچ کا دن برصغیر کے مسلمانوں کی تاریخ میں ایک عظیم سنگِ میل کی حیثیت رکھتا ہے۔

یہ بھی پڑھیں: وزیراعلیٰ کے پی آج سے لاہور کا تین روزہ دورہ کریں گے

قراردادِ لاہور کا مقام

اپنے خصوصی پیغام میں انہوں نے کہا کہ قراردادِ لاہور کے ذریعے ایک علیٰحدہ خود مختار اسلامی ریاست کی بنیاد رکھی گئی اور یہ دن ہمیں اپنے اکابرین کی بصیرت اور ان کی بے مثال قربانیوں کی یاد دلاتا ہے جن کی بدولت آج ہم ایک آزاد ریاست میں سانس لے رہے ہیں۔

یہ بھی پڑھیں: پنجاب کے وزیراعلیٰ کا کل بسنت کی اپنی تمام مصروفیات منسوخ کرنے کا اعلان

عزم و اتحاد کی تجدید

سپیکر نے زور دیا کہ یومِ پاکستان محض ایک جشن نہیں بلکہ بانیانِ پاکستان کے وژن کے مطابق ملک کو ایک مضبوط، مستحکم اور فلاحی ریاست بنانے کے عہد کی تجدید کا دن ہے۔ ہمیں 'اتحاد، ایمان اور تنظیم' کے سنہری اصولوں کو اپنا کر جمہوری استحکام اور قومی ترقی کے لیے مشترکہ جدوجہد کرنی ہوگی۔

یہ بھی پڑھیں: ڈاکٹر چکر لگوا رہے تھے لیکن چیٹ جی پی ٹی نے کس طرح مرض کی تشخیص کر کے مریض کی زندگی بچا لی؟ جانیے

شہداء کی قربانیاں

سردار ایاز صادق نے وطنِ عزیز کی حفاظت کے لیے جانیں نچھاور کرنے والے شہداء کو خراجِ تحسین پیش کرتے ہوئے کہا کہ ان کی قربانیاں قوم کے لیے مشعلِ راہ ہیں۔ انہوں نے ملک کو درپیش دہشت گردی اور معاشی چیلنجز کا ذکر کرتے ہوئے کہا کہ پاکستان کی مسلح افواج اور سیکیو رٹی ادارے ملک کے دفاع کے لیے ہمہ وقت سرگرم ہیں اور پوری قوم دہشت گردی کے خلاف اپنی افواج کے ساتھ شانہ بشانہ کھڑی ہے۔

یہ بھی پڑھیں: ایران کے ساتھ جنگ میں اسرائیل کو اربوں ڈالر کا نقصان پہنچنے کا انکشاف

قومی یکجہتی اور عالمی حمایت

سپیکر نے کہا کہ قومی یکجہتی اور آئین کی بالادستی ہی ملک کی ترقی کی ضمانت ہیں۔ اس موقع پر انہوں نے فلسطین اور کشمیر کے مظلوم عوام کے ساتھ پاکستان کی غیر متزلزل حمایت کا اعادہ کیا اور واضح کیا کہ پاکستان ہر عالمی فورم پر ان کے حقوق کے لیے آواز بلند کرتا رہے گا۔

دعائے خیر

پیغام کے آخر میں سپیکر نے ملک کی سلامتی، ترقی اور خوشحالی کے لیے خصوصی دعا بھی کی۔