ایل پی جی قیمتوں میں حالیہ اضافے اور پیٹرولیم مصنوعات کی قیمتوں میں متوقع مزید اضافے کو مسترد کرتے ہیں ، یہ عوام دشمن اور ظالمانہ اقدام ہے،شیخ وقاص اکرم

پاکستان تحریک انصاف کا ردعمل

لاہور (ڈیلی پاکستان آن لائن) پاکستان تحریک انصاف کا ایل پی جی اور پیٹرولیم قیمتوں میں ممکنہ اضافے پر ردعمل، شیخ وقاص اکرم کا کہنا ہے کہ ایل پی جی گیس کی قیمتوں میں حالیہ اضافے اور پیٹرولیم مصنوعات کی قیمتوں میں متوقع مزید اضافے کو مسترد کرتے ہیں، یہ عوام دشمن اور ظالمانہ اقدام ہے۔ موجودہ حکومت کی غلط معاشی پالیسیوں، نااہلی، اور آئی ایم ایف پر اندھا انحصار ملک کو شدید مہنگائی کے گرداب میں دھکیل رہا ہے۔

مہنگائی میں اضافے کے خطرات

اپنے ایکس بیان میں شیخ وقاص اکرم نے کہا کہ پیٹرولیم مصنوعات کی قیمتوں میں ممکنہ اضافہ نہ صرف ٹرانسپورٹ کے اخراجات میں اضافہ کرے گا بلکہ اس کے اثرات براہ راست ہر شے کی قیمت پر پڑیں گے۔ آٹا، چینی، سبزیاں، ادویات اور دیگر ضروری اشیاء کی قیمتیں مزید بڑھ جائیں گی، جس سے مہنگائی کا ایک نیا طوفان آئے گا۔ یہ سب کچھ ایک ایسی حکومت کے دور میں ہو رہا ہے جو عوام کو ریلیف دینے میں مکمل طور پر ناکام ہو چکی ہے۔