پنجاب : سی ٹی ڈی کی مختلف شہروں میں کارروائیاں، 34 دہشت گرد گرفتار

سی ٹی ڈی کی بڑی کارروائی

لاہور (ڈیلی پاکستان آن لائن) - کاونٹر ٹیررازم ڈیپارٹمنٹ (سی ٹی ڈی) پنجاب نے انٹیلی جنس اطلاعات کی بنیاد پر صوبے کے مختلف شہروں میں کارروائیاں کرتے ہوئے 34 مبینہ دہشت گردوں کو گرفتار کر لیا۔

گرفتار ملزمان کی تفصیلات

نجی ٹی وی دنیا نیوز کے مطابق، ترجمان سی ٹی ڈی نے بتایا کہ گرفتار ملزمان میں فتنہ الخوارج سے تعلق رکھنے والے خطرناک دہشت گرد بھی شامل ہیں۔ یہ کارروائیاں لاہور، بہاولپور، ننکانہ صاحب، راولپنڈی سمیت دیگر شہروں میں کی گئیں، لاہور سے 2 جبکہ بہاولپور سے ایک انتہائی مطلوب دہشت گرد کو حراست میں لیا گیا۔

دہشت گردوں کے قبضے سے ملنے والے مواد

حکام کا کہنا ہے کہ گرفتار دہشت گردوں کے قبضے سے دھماکا خیز مواد، ایک ہینڈ گرنیڈ، 18 ڈیٹونیٹرز اور دیگر خطرناک اشیاءبرآمد ہوئی ہیں۔ یہ دہشت گرد قانون نافذ کرنے والے اداروں پر حملے کی منصوبہ بندی مکمل کر چکے تھے، تاہم بروقت کارروائی سے ایک بڑا سانحہ ٹال دیا گیا۔