محرم کے انتظامات پر مجالس اور جلوسوں کے منتظمین کا مطمئن ہونا حکومت کی کامیابی ہے: عظمیٰ بخاری

وزیر اطلاعات کی ملاقات

لاہور (ڈیلی پاکستان آن لائن) وزیر اطلاعات پنجاب عظمیٰ بخاری سے محرم الحرام کے سلسلے میں مجالس اور جلوسوں کے لائسنس ہولڈرز اور امن کمیٹی کے اراکین نے ملاقات کی۔ اس موقع پر محرم کے دوران عزادارانِ امام حسینؑ کے لیے کیے گئے مثالی انتظامات پر حکومتِ پنجاب کا شکریہ ادا کیا گیا۔

یہ بھی پڑھیں: کیا واقعی پنجاب میں گرمیوں کی تعطیلات 22 مئی سے شروع ہوں گی؟ وہ سب کچھ جو آپ کو جان لینا چاہیے

شیعہ علماء کرام کا شکریہ

شیعہ علماء کرام نے وزیراعلیٰ پنجاب مریم نواز کی ذاتی نگرانی میں کیے گئے بہترین انتظامات اور سہولیات پر بھرپور اعتماد کا اظہار کرتے ہوئے ان کا تہہ دل سے شکریہ ادا کیا۔ شیعہ علماء کونسل پنجاب کے وفد نے وزیر اطلاعات عظمیٰ بخاری کو وزیراعلیٰ پنجاب کے لیے "ایوارڈ امام حسین" بھی پیش کیا، جو محرم الحرام کے دوران غیر معمولی انتظامی کارکردگی کا اعتراف ہے۔ ملاقات میں سیکرٹری اطلاعات پنجاب طاہر رضا ہمدانی بھی موجود تھے۔

یہ بھی پڑھیں: بجٹ تقریر، حکومت نے بھارت کی آبی جارحیت سے نمٹنے کیلئے اقدامات کا اعلان کردیا

عظمیٰ بخاری کا بیان

عظمیٰ بخاری نے اس موقع پر کہا کہ محرم کے انتظامات پر مجالس اور جلوسوں کے منتظمین کا مطمئن ہونا حکومت کی کامیابی ہے۔ وزیراعلیٰ مریم نواز نے تمام انتظامات کی لمحہ بہ لمحہ خود مانیٹرنگ کی اور یہی وجہ ہے کہ پنجاب میں شہریوں کو ہر تہوار پر منفرد اور نمایاں انتظامات نظر آتے ہیں۔ اہل تشیع کمیونٹی کی جانب سے حکومت پنجاب سے اظہارِ تشکر ایک مثبت روایت ہے۔ وزیراعلیٰ مریم نواز عوام کی خدمت میں کسی قسم کی کوتاہی برداشت نہیں کرتیں، یہی وجہ ہے کہ ان کی ٹیم اور پنجاب کی انتظامیہ ہر وقت میدانِ عمل میں مصروف رہتی ہے۔

وفد کے اراکین

ملاقات کرنے والے وفد میں علامہ کاظم رضا نقوی، شبیہ شیرازی، قاسم علی (فوکل پرسن)، یوسف جوہری، حافظ اقبال، الیاس یزدانی، صغیر ورک، کامران نقوی، اصغر حسین، ملک ناصر، ملک شاہد، واجد علی، عمار نقوی اور صفدر جعفری شامل تھے۔