قومی ایئرلائن کی نجکاری کے لئے 4 پارٹیاں شارٹ لسٹ

اسلام آباد (ڈیلی پاکستان آن لائن) سیکرٹری نجکاری کمیشن عثمان باجوہ نے کہا ہے کہ پانچ پارٹیوں نے درخواستیں جمع کرائیں، جبکہ اسکروٹنی کمیٹی نے چار پارٹیوں کو نیلامی میں شرکت کی منظوری دی ہے۔ جلد نیلامی کی تاریخ طے کی جائے گی۔

قومی اسمبلی کی کمیٹی کا اجلاس

قومی اسمبلی کی قائمہ کمیٹی نجکاری کا اجلاس چیئرمین فاروق ستار کی زیر صدارت منعقد ہوا۔ سیکرٹری نجکاری کمیشن عثمان باجوہ نے بتایا کہ شارٹ لسٹ کی گئی پارٹیوں کو کل سے پی آئی اے کے دفاتر میں اکاؤنٹس اور آپریشنز کا جائزہ لینے کی اجازت دی گئی ہے۔ پارٹیوں کی ڈیو ڈیلیجنس کے بعد بولی کی تاریخ مقرر کی جائے گی۔ حکومت قومی ایئر لائن کی نجکاری رواں سال کی آخری سہ ماہی تک مکمل کرنے کا ارادہ رکھتی ہے، سرمایہ کاروں کی تسلی کے بعد ہی پی آئی اے کی نجکاری کی جائے گی۔

پی آئی اے کی خریداری میں دلچسپی

ایکسپریس نیوز کے مطابق، اجلاس کے دوران فاروق ستار نے کہا کہ وزیر اعلیٰ پنجاب بھی پی آئی اے کی خریداری میں دلچسپی رکھتی تھیں۔

سیکرٹری نجکاری کمیشن نے جواب دیا کہ پنجاب حکومت اپنی ایئر لائن شروع کرنا چاہتی ہے لیکن انہوں نے پی آئی اے کی نجکاری میں اظہار دلچسپی نہیں کیا۔

پی آئی اے کی پروازوں کی تازہ صورتحال

سی ای او پی آئی اے نے کہا کہ پی آئی اے نے فرانس کی فلائٹس شروع کر دی ہیں اور مانچسٹر کی فلائٹس کسی بھی وقت بحال ہو جائیں گی۔ پی آئی اے کے حالات گزشتہ سال کے مقابلے میں بہت بہتر ہیں۔

ملازمین کی جاب سکیورٹی

سیکرٹری نجکاری کمیشن نے کہا کہ ادارے کی نجکاری کے دوران پی آئی اے ملازمین کی جاب سکیورٹی کے لیے کام کیا جائے گا۔ نئے خریدار کو پی آئی اے کے 19 جہازوں کے فلیٹ کو 45 تک لے کر جانا ہوگا۔