ڈی ایس پی سراج شعیب اختر کے شاگرد بن گئے
کرکٹ میں اگر فاسٹ بولر تیز رفتار گیندیں پھینکے، بلے بازوں کو چھیڑے اور پھر پویلین جاتے ہوئے ان پر جملے کسے تو مداح ہمیشہ سے یہ سب دیکھ کر محظوظ ہوتے آئے ہیں۔
اس کھیل میں یہ سب پاکستانی فاسٹ بولر شعیب اختر روز مار رہے تھے، آسٹریلوی بولرز بھی سلیجنگ کے ماہر رہے ہیں لیکن یہ سب جب کوئی انڈین فاسٹ بولر کرے تو دھوم مچ جاتی ہے۔
ایسا ہی کام ایڈیلیڈ میں کھیلے جانے والے انڈیا اور آسٹریلیا کے ٹیسٹ میچ میں بھی دیکھنے کو ملا، لیکن بولر جسپریت بمرا نہیں بلکہ محمد سراج تھے۔
ٹیسٹ میچ کے پہلے روز صرف 180 رنز پر آؤٹ ہونے والی انڈین ٹیم کی نظریں اپنے فاسٹ بولرز پر تھیں جنہوں نے پرتھ ٹیسٹ میں بھی عمدہ بولنگ کا مظاہرہ کرتے ہوئے انڈیا کی جیت یقینی بنائی تھی۔
ایسے میں فاسٹ بولر محمد سراج جو عام طور پر 130 سے 140 کلومیٹر فی گھنٹہ کی رفتار سے بولنگ کرتے ہیں نے ایک ایسی گیند پھینکی جس نے سب کو حیران کر دیا۔
ٹی وی سکرینز پر ان کی گیند کی رفتار 181 کلومیٹر فی گھنٹہ کے طور پر دکھائی دی اور پھر کچھ ہی دیر میں یہ واضح ہو گیا کہ انہوں نے شعیب اختر کا ریکارڈ نہیں توڑا بلکہ یہ ایک تکنیکی مسئلہ تھا۔
خیال رہے کہ دنیا کے مشہور پاکستانی فاسٹ بولر شعیب اختر کو دنیا کا تیز ترین فاسٹ بولر کہا جاتا ہے اور ان کی تیز ترین گیند کی رفتار 161.3 کلومیٹر فی گھنٹہ تھی جو انہوں نے انگلینڈ اور پاکستان کے درمیان کھیلے گئے ورلڈ کپ میچ میں پھینکی تھی۔
ان کے علاوہ آسٹریلیا کے بریٹ لی اور شان ٹیٹ بھی انتہائی تیز رفتار گیندیں پھینک چکے ہیں۔ کرکٹ براڈکاسٹنگ میں جدت آنے کے بعد سے بولرز کی گیندوں کی رفتار ٹی وی پر دکھائی جاتی رہی ہے لیکن 90 کی دہائی میں اس کے آغاز کے بعد سے یہ سہولت تمام میچوں کے لیے دستیاب نہیں رہی۔
اس لیے یہ دعویٰ کہ کس کی بولنگ زیادہ تیز رفتار ہے، صرف ان ہی میچوں کی بنیاد پر کیا جاتا ہے جن کا ریکارڈ موجود ہے۔
خیر اس بحث اور تکنیکی مسئلے پر بات چل ہی رہی تھی کہ محمد سراج نے مارنس لبوشین کی طرف غصے سے گیند پھینک دی۔ سراج کی ناراضگی کی وجہ یہ تھی کہ وہ اپنے رن اپ پر بھاگ کر جب امپائر کے قریب پہنچے تو لبوشین پیچھے ہٹ گئے۔ سراج کو یہ بات ناگوار گزری اور انہوں نے گیند وکٹوں کی جانب پھینک دی۔
بعد میں ری پلے میں دیکھا جا سکتا ہے کہ گیند پھینکنے کے دوران ایک شخص سٹینڈز میں بیئر پائپ لے کر جا رہا تھا۔
بات یہاں ختم نہیں ہوئی، اگلے روز جب آسٹریلوی بلے باز ٹریوس ہیڈ نے ایک جارحانہ سنچری بنا لی اور اب میچ انڈیا سے دور لے جا رہے تھے تو آخرکار سراج نے انہیں بولڈ کر دیا۔
جب ہیڈ پویلین واپس جانے لگے تو سراج نے اُنہیں غصے میں کچھ کہا، جس پر ہیڈ نے جواب دیا اور پھر سراج نے انہیں پویلین جانے کا کہا۔ ہیڈ اُس وقت 4 چھکوں اور 17 چوکوں کی مدد سے 140 رنز بنا چکے تھے۔
جب وہ واپس باؤنڈری پر فیلڈنگ کے لیے آئے تو آسٹریلوی مداحوں کی جانب سے اُن پر آوازیں بھی کسی گئیں۔
خیال رہے کہ سراج کے سپیل کے دوران ہیڈ نے ان کے خلاف جارحانہ بیٹنگ کی تھی اور سراج نے ایک موقع پر ان کا کیچ بھی ڈراپ کیا تھا۔
سوشل میڈیا پر سراج کو ’ڈی ایس پی سراج‘ کا نام دیا جا رہا ہے اور اکثر انڈین صارفین انہیں شاباش دے رہے ہیں۔ اس کی وجہ یہ ہے کہ تیلنگانا میں انہیں اعزازی طور پر تیلنگانا پولیس میں ڈی ایس پی کا عہدہ دیا گیا تھا۔
جب ان کی بولنگ کی رفتار 181.3 سکرین پر دکھائی گئی تو صارفین کی جانب سے اس کا سکرین شاٹ لے کر شیئر کیے جا رہے ہیں۔
ایک صارف نے لکھا کہ ’ڈی ایس پی سراج اب شعیب اختر کو پیچھے چھوڑنے والے ہیں۔‘
بہت سے صارفین کو محمد سراج کی جانب سے ٹریوس ہیڈ کو 140 رنز پر آؤٹ کرنے کے بعد ان کے برہمی کا مظاہرہ پسند نہیں آیا۔
ایک صارف ادتیا ساہا نے کہا کہ ’مجھے سراج کا یہ انداز بہت پسند آیا ہے لیکن مجھے یقین ہے کہ کچھ لوگوں کو اس سے مسئلہ ہوگا۔‘
اس پر راہل نامی صارف نے جواب دیتے ہوئے کہا کہ ’وہ 140 پر آؤٹ ہوئے تھے 14 پر نہیں۔‘ ایک صارف نے لکھا کہ ’بطور فاسٹ بولر یہ اس لیے بھی فطری ردِ عمل تھا کیونکہ سراج نے آج کچھ زیادہ اچھی بولنگ نہیں کی اور ہیڈ کا کیچ بھی چھوڑا تھا۔‘
ایک صارف نے لکھا کہ ’جارحانہ انداز بولنگ میں دکھانا چاہیے نہ کہ کیمرہ کے لیے۔‘
ایک صارف نے لکھا کہ ’یہ جارحانہ انداز انڈیا کے فاسٹ بولرز میں گذشتہ 40 سالوں میں دیکھنے کو نہیں ملتا تھا۔ تاہم اب کوہلی کے بعد سراج میں بھی یہ انداز آ گیا ہے۔ یہ تو راولپنڈی ایکسپریس شعیب اختر کے شاگرد نکلے۔‘
ماضی میں شعیب اختر بھی سراج کی بولنگ کی تعریف کر چکے ہیں۔
