لیسکو کے فنکشنل ہیڈز کا اہم اجلاس، بجلی چوری اور کرپشن کیخلاف پالیسی پر سختی سے عملدرآمد کا فیصلہ

لاہور (ڈیلی پاکستان آن لائن) لاہور الیکٹرک سپلائی کمپنی (لیسکو) کے چیف ایگزیکٹو آفیسر انجینئر محمد رمضان بٹ کی زیر صدارت فنکشنل ہیڈز کا اہم اجلاس منعقد ہوا۔ اس اجلاس میں کمپنی کی کارکردگی کو بہتر بنانے، صارفین کو معیاری خدمات فراہم کرنے اور بدعنوانی کے خاتمے کے لیے اہم فیصلے کیے گئے۔

اجلاس سے خطاب کرتے ہوئے، چیف ایگزیکٹو انجینئر محمد رمضان بٹ نے زور دیا کہ "صارفین کو ایمانداری اور شفافیت کے ساتھ بجلی فراہم کرنا ہمارا اولین فریضہ ہے اور ان کی خدمت ہماری پہلی ترجیح ہے۔" انہوں نے مزید کہا کہ لیسکو کی بہتری کے لیے تمام فنکشنل ہیڈز نے مل کر جامع پالیسیاں تشکیل دی ہیں، اور اب ان پر عملدرآمد یقینی بنانا ہوگا۔

چیف ایگزیکٹو نے لیسکو کو ایک خاندان قرار دیتے ہوئے کہا، "ہمیں مل کر اس کی بہتری کے لیے اقدامات کرنا ہوں گے، کیونکہ بہتری کی کوئی حد نہیں۔ مثبت سوچ ہی مثبت اقدامات کو جنم دیتی ہے اور کامیابی کے راستے ہموار کرتی ہے۔" انہوں نے اس بات پر زور دیا کہ ہمیں مل کر بجلی چوری اور بدعنوانی کے خاتمے کے لیے سخت اقدامات کرنا ہوں گے۔

انہوں نے کہا کہ "ہمارے پاس بہترین تربیت یافتہ افسران اور عملہ موجود ہے جو صارفین کو بہترین سہولیات فراہم کرنے کی صلاحیت رکھتے ہیں۔ میں خود ہر ایک سے ملاقات کروں گا اور ہر سطح پر رہنمائی کے لئے موجود رہوں گا۔ بجلی چوری اور کرپشن کے خلاف ہماری 'زیرو ٹالرنس پالیسی' ہے، جس پر سختی سے عملدرآمد کیا جائے گا۔"

اجلاس میں لیسکو کے تمام عہدیداران نے شرکت کی، جن میں آپریشنز ڈائریکٹر اعجاز احمد بھٹی، کسٹمر سروسز ڈائریکٹر عباس علی، ہیومن ریسورس ڈائریکٹر ضمیر حسین کلاچی، ڈی جی ایڈمن معصومہ عادل، سی ایف او محمد احمد سعید، چیف انجینئر آپریشنز ندیم ملک، چیف انجینئر ڈویلپمنٹ عمران محمود، چیف انجینئر پی اینڈ ڈی فیصل زکریا، چیف انجینئر ٹی ایس ڈیزائن نثار سرور، چیف انجینئر پی آئی یو انور وٹو، ڈی جی میراڈ محمد حسین، ڈائریکٹر لیگل گوہر ایوب، چیف آئی ٹی آفیسر محمد عثمان علی، منیجر کمپلینٹ سیل نعمان ملہی اور ترجمان لیسکو رابعہ قادر شامل تھے۔