میرا عزم ہے کہ ہر نوجوان کے ہاتھ میں کوئی نہ کوئی ہنر ضرور ہو، وزیراعلیٰ مریم نواز

حکومت کا انقلابی اقدام

لاہور (ڈیلی پاکستان آن لائن) وزیراعلیٰ پنجاب مریم نواز نے کہا ہے کہ حکومت نوجوانوں کو بااختیار بنانے کی راہ میں انقلابی اقدام کررہی ہے۔ پنجاب میں فری لانسرز کے لیے انٹرنیشنل سرٹیفکیشن پروگرام شروع کیا ہے۔ سرکاری سکولوں میں ایڈ ٹیک، میٹرک پائلٹ پروجیکٹ شروع ہوچکا ہے۔ زراعت، ماحولیات سمیت ہر سرکاری محکمے میں انٹرن شپ کا آغاز کیا ہے۔

یہ بھی پڑھیں: گیڈروں میں بھاگنے والی خصوصیت ہوتی ہے لیڈروں میں نہیں، لیڈر تھے تو آگے آ کر گولی کھاتے،طلال چودھری

نوجوانوں کی سکلز کے عالمی دن پر پیغام

وزیر اعلیٰ مریم نواز نے نوجوانوں کی سکلز کے عالمی دن پر اپنے پیغام میں کہا کہ زمانہ بدل چکا ہے آج کی دنیا تعلیم کے ساتھ ہنر کی بھی طالب ہے۔ ڈگری نہیں بلکہ ہنر ہی وہ طاقت ہے جو قوموں کی تقدیر بدل دیتی ہے۔ مہارت صرف روزگار کا ذریعہ نہیں بلکہ خود اعتمادی اور قومی ترقی کی ضمانت ہے۔ دور حاضر میں ہنر ہی ترقی کی کلید ہے۔ نوجوانوں کو آئی ٹی سکلز فراہم کی جا رہی ہیں جو اس وقت کا سب سے بڑا ٹول ہیں۔ نواز شریف آئی ٹی سٹی نوجوانوں کی سکلز کو پلیٹ فارم اور تقویت دے گا۔ TEVTA پنجاب کے نوجوانوں کو جدید دور کی ضرورتوں کے مطابق تربیت دے رہا ہے۔

نوجوانوں کے مستقبل کا عزم

وزیراعلیٰ مریم نواز نے کہا کہ میرا عزم ہے کہ ہر نوجوان کے ہاتھ میں کوئی نہ کوئی ہنر ضرور ہو۔ مہارت روزگار کا راستہ ہی نہیں بلکہ عزت اور ترقی کی ضمانت ہے۔ میرا خواب ہے کہ پنجاب کا نوجوان نوکری کا طلب گار نہیں بلکہ روزگار دینے کے قابل ہو۔ مشن ہے کہ ہمارے نوجوان فری لانسنگ سے لے کر انٹرپرینیور شپ تک ہر میدان میں کامیاب ہوں۔