خیبرپختونخوا، حالیہ سیلاب میں جاں بحق 411 میں سے 352 افراد کے لواحقین کو معاوضے کی ادائیگی مکمل

وزیراعلیٰ خیبرپختونخوا کی ہدایت

پشاور(ڈیلی پاکستان آن لائن) وزیراعلیٰ خیبرپختونخوا علی امین گنڈاپور نے سیلاب متاثرین کو معاوضوں کی ادائیگی اور بحالی کا عمل تیز کرنے کی ہدایت کر دی۔

یہ بھی پڑھیں: بھارت نے پاکستان پر لگائے الزامات کے ثبوت نہیں دکھائے: برطانوی وزیر خارجہ کھل کر بول پڑے

ویڈیو لنک اجلاس میں پیشرفت کا جائزہ

وزیراعلیٰ علی امین گنڈاپور کی زیر صدارت سیلاب متاثرہ اضلاع کے حوالے سے ویڈیو لنک اجلاس منعقد ہوا جس میں ریلیف اور بحالی کے کاموں پر پیشرفت کا جائزہ لیا گیا۔ بریفنگ میں بتایا گیا ہے کہ حالیہ سیلابوں میں 411 افراد جاں بحق ہوئے، جن میں سے 352 کے لواحقین کو معاوضوں کی مد میں ادائیگی مکمل کر دی گئی ہے۔ جاں بحق افراد کے لواحقین میں اب تک 704 ملین روپے تقسیم کئے جا چکے ہیں، اسی طرح 132 زخمیوں میں سے 60 کو معاوضوں کی مد میں 30 ملین روپے ادا کئے گئے ہیں۔

یہ بھی پڑھیں: عادل راجہ نے پاکستان کی خفیہ ایجنسی کے خلاف ایک اور جھوٹا پراپیگنڈا کرنا شروع کردیا

گھروں کے نقصانات کے ازالے کی کارروائیاں

بریفنگ میں مزید بتایا گیا ہے کہ متاثرہ گھروں کا ڈیٹا اکٹھا کرلیا گیا ہے۔ 571 مکمل تباہ شدہ گھروں میں سے 367 کے مالکان کو اور 1983 جزوی متاثرہ گھروں میں سے 1094 کے مالکان کو معاوضے دیئے جا چکے ہیں، مجموعی طور پر گھروں کے نقصانات کی مد میں 595 ملین روپے ادا کئے گئے ہیں جبکہ باقی ماندہ معاوضوں کی ادائیگی آئندہ دو روز میں مکمل کی جائے گی۔ متاثرہ خاندانوں میں اب تک 29 ہزار 631 فوڈ پیکجز بھی تقسیم کئے جا چکے ہیں۔

یہ بھی پڑھیں: بلوچستان میں انٹرمیڈیٹ کے امتحانات ملتوی

بحالی کے عمل کی نگرانی

وزیراعلیٰ علی امین گنڈاپور نے ہدایت کی کہ معاوضوں کی ادائیگی کے فوری بعد بحالی کے عمل کا آغاز کیا جائے اور متاثرہ انفراسٹرکچر کی بحالی کے لئے ڈپٹی کمشنرز خود نگرانی کریں۔ پی سی ون دفاتر میں بیٹھ کر نہیں بلکہ فیلڈ میں جا کر تیار کئے جائیں جبکہ دریاؤں اور آبی گزرگاہوں کی ڈیسلٹنگ اور حفاظتی پشتوں کی تعمیر کے لئے ایک بڑا ون ٹائم منصوبہ شروع کیا جائے گا۔

یہ بھی پڑھیں: فیصل آباد؛انسداد دہشتگردی عدالت نے 9 مئی کو رانا ثنا اللہ کے گھر پر حملے کے کیس کا فیصلہ سنا دیا

معلومات کا ریکارڈ مرتب کرنے کی ہدایت

وزیراعلیٰ نے ڈپٹی کمشنرز کو ہدایت کی کہ وہ اپنے اضلاع میں گزشتہ چالیس برس کے دوران پانی کی مقدار کا ریکارڈ مرتب کریں اور آبی گزرگاہوں اور نالوں کے اطراف سے تجاوزات ہٹانے کے لئے بلاامتیاز کارروائی کریں۔ تباہ شدہ اسکولوں اور صحت مراکز کے لئے پری فیب اسٹرکچرز لگانے اور وبائی امراض کے ممکنہ پھیلاؤ کو روکنے کے لئے فوری اقدامات اٹھانے کی ہدایت بھی کی۔

سول انتظامیہ کی کارکردگی کا اعتراف

وزیراعلیٰ نے سول انتظامیہ کی حالیہ کارکردگی کو سراہتے ہوئے کہا ہے کہ ہنگامی صورتحال میں جس طرح فوری رسپانس دیا گیا اس کی ملک کی تاریخ میں مثال نہیں ملتی۔ بحالی کے مرحلے میں بھی اسی جذبے کے ساتھ کام کیا جائے۔