اسلام آباد ہائی کورٹ کا اہم فیصلہ: روزنامہ ’’خبروالے‘‘ کی رجسٹریشن کی تجدید مسترد کرنے کا حکم کالعدم، پریس رجسٹرار کو 15 روز میں سرٹیفکیٹ جاری کرنے کی ہدایت

اسلام آباد ہائی کورٹ کا فیصلہ

اسلام آباد (ڈیلی پاکستان آن لائن) اسلام آباد ہائی کورٹ نے روزنامہ ‘‘خبروالے’’ (حیدرآباد) کی رجسٹریشن کی تجدید مسترد کرنے کے پریس رجسٹرار کے حکم کو غیر قانونی قرار دیتے ہوئے کالعدم کر دیا ہے۔ عدالت نے ہدایت کی ہے کہ اخبار کی رجسٹریشن کا سرٹیفکیٹ آئندہ 15 روز کے اندر جاری کیا جائے۔ یہ فیصلہ جسٹس محسن اختر کیانی نے سول متفرق اپیل نمبر 61/2025 میں محفوظ شدہ فیصلہ سناتے ہوئے دیا۔

یہ بھی پڑھیں: قرآن و سنت کے خلاف تمام ترامیم کو مسترد کرتے ہیں، موقع ملا تو تمام اختیارات گراس روٹ سطح تک منتقل کریں گے: حافظ نعیم الرحمان کا عوامی اجتماع سے خطاب

اپیل گزار کا پس منظر

اپیل گزار بی بی صفینہ، جو روزنامہ ‘‘خبروالے’’ کی پبلشر اور چیف ایڈیٹر ہیں، نے پریس رجسٹرار آفس کے 29 اپریل 2025 کے اس حکم کو چیلنج کیا تھا۔ یہ حکم اس بنیاد پر جاری کیا گیا تھا کہ بینک اسٹیٹمنٹ سے اخبار کے لیے مالی وسائل، ملازمین کو تنخواہوں کی ادائیگی اور اشاعت کے معیار سے متعلق تسلی بخش شواہد سامنے نہیں آتے۔

یہ بھی پڑھیں: لاہور بورڈ میں سکھ سٹوڈنٹ اونکارسنگھ نے اسلامیات لازمی میں 100میں سے 98نمبر لیے:رانا سکندر حیات

وکالت کا موقف

عدالت کے سامنے اپیل گزار کے وکیل ملک محمد گلفام اعوان ایڈووکیٹ ہائی کورٹ نے مؤقف اختیار کیا کہ پریس، نیوزپیپر، نیوز ایجنسی اینڈ بک رجسٹریشن آرڈیننس 2002 اور اس کے تحت بنائے گئے قواعد 2009 میں ایسی کوئی شق موجود نہیں جو رجسٹریشن کی تجدید کے لیے مالی حیثیت، تنخواہوں کی ادائیگی یا اشاعت کے معیار کو جانچنے کا اختیار پریس رجسٹرار کو دیتی ہو۔ لہٰذا یہ حکم قانون کے منافی اور اختیارات سے تجاوز کے مترادف ہے۔

یہ بھی پڑھیں: بانی پی ٹی آئی کی تینوں بہنوں کو حراست میں لے لیا گیا

وفاقی حکومت کی نمائندگی

دوسری جانب وفاق کی نمائندگی کرنے والے اسسٹنٹ اٹارنی جنرل اور پریس رجسٹرار آفس کے خصوصی معاون نے مؤقف اختیار کیا کہ اخبار مالی طور پر مستحکم نہیں اور اس کا معیار بھی مطلوبہ سطح پر پورا نہیں اترتا، اس لیے رجسٹریشن کی تجدید نہیں کی گئی۔ عدالت نے ریکارڈ کا تفصیلی جائزہ لینے کے بعد قرار دیا کہ اپیل گزار کے پاس ضلعی انتظامیہ کی جانب سے باقاعدہ جاری کردہ ریگولیرٹی سرٹیفکیٹس موجود ہیں جو اس بات کا ثبوت ہیں کہ روزنامہ ‘‘خبروالے’’ باقاعدگی سے شائع ہو رہا ہے۔

یہ بھی پڑھیں: بلوچستان ہائیکورٹ کے چیف جسٹس کس طرح بنے تھے ؟ جسٹس قاضی فائز عیسیٰ نے فل کورٹ ریفرنس میں واقعہ سنا دیا

عدالت کا فیصلہ

مزید برآں، عدالت نے واضح کیا کہ آرڈیننس 2002 اور قواعد 2009 میں اشاعت کے معیار یا مالی وسائل کی جانچ کے لیے کوئی واضح قانونی معیار یا طریقہ کار مقرر نہیں کیا گیا، اس لیے پریس رجسٹرار کو اس بنیاد پر رجسٹریشن کی تجدید روکنے کا اختیار حاصل نہیں۔ عدالت نے یہ بھی آبزرو کیا کہ ملازمین کی تنخواہوں سے متعلق شکایات کی جانچ متعلقہ اداروں، بالخصوص آئی ٹی این ای، کے دائرہ اختیار میں آتی ہے، نہ کہ پریس رجسٹرار کے۔ اس لیے اس بنیاد پر بھی رجسٹریشن کی تجدید سے انکار قانوناً درست نہیں۔

آئندہ اقدامات

فیصلے میں مزید کہا گیا کہ جب تک قانون اور قواعد میں واضح معیار اور طریقہ کار طے نہ کر دیا جائے، کسی انتظامی افسر کو اشاعت کے معیار یا مالی حالت کی بنیاد پر رجسٹریشن کے معاملات میں صوابدیدی اختیارات استعمال کرنے کی اجازت نہیں دی جا سکتی۔ عدالت نے وفاقی حکومت کو یہ بھی ہدایت کی کہ وہ مستقبل میں ایسے معاملات سے بچنے کے لیے متعلقہ قوانین اور قواعد میں واضح معیار متعین کرے۔ ان تمام وجوہات کی بنیاد پر عدالت نے اپیل منظور کرتے ہوئے پریس رجسٹرار کا متنازع حکم کالعدم قرار دیا اور ہدایت کی کہ روزنامہ ‘‘خبروالے’’ کی رجسٹریشن کی تجدید کا سرٹیفکیٹ 15 روز کے اندر جاری کیا جائے۔